බටහිර යුක්රේනයේ ලිවිව් නගරයේ ඉරිදා අලුයම සිදු වූ පිපිරීම් මාලාවකින් පොලිස් නිලධාරිනියක මිය ගොස් තවත් 24 දෙනෙකු පමණ තුවාල ලබා තිබේ. බලධාරීන් මෙම සිදුවීම “බරපතල ප්රතිවිපාක ඇති කළ ත්රස්තවාදී ක්රියාවක්” ලෙස නම් කර විමර්ශන ආරම්භ කර ඇත. මූලික පරීක්ෂණවලට අනුව, කුණු බඳුන්වල අටවා තිබූ ගෙදර හැදූ පුපුරණ ද්රව්ය මේ සඳහා භාවිතා කර ඇති අතර, නගර මධ්යයේ වෙළඳසැලක සිදුවූ සොරකමක් පිළිබඳ පණිවිඩයකට ප්රතිචාර දැක්වීමට පොලිසිය එම ස්ථානයට පැමිණි අවස්ථාවේදී මෙම පිපිරීම් සිදුව තිබේ.
මෙම ප්රහාරයෙන් 23 හැවිරිදි වික්ටෝරියා ෂ්පිල්කා නම් පොලිස් නිලධාරිනිය ජීවිතක්ෂයට පත් වූ අතර, ඇය පසුගිය වසරේදී විවාහ වූ අයෙකි. යුක්රේන ජනාධිපති වොලොඩිමියර් සෙලෙන්ස්කි ප්රකාශ කළේ ප්රහාරයට සම්බන්ධ බවට සැක කෙරෙන පුද්ගලයින් කිහිප දෙනෙකු දැනටමත් අත්අඩංගුවට ගෙන ඇති බවයි. ඒ අතර පෝලන්ත දේශසීමාවට ආසන්න ස්ටාරි සම්බීර්හිදී අත්අඩංගුවට ගත් 33 හැවිරිදි කාන්තාවක ද වන අතර, ඇය රුසියානු මෙහෙයවීමක් මත මෙම ප්රහාරය සිදු කර ඇති බවට පොලිසිය සැක කරයි.
රුසියාවෙන් දැවැන්ත මිසයිල සහ ඩ්රෝන ප්රහාර මාලාවක්
ලිවිව් ප්රහාරයට අමතරව, රුසියාව විසින් යුක්රේනය පුරා කලාප හයක් ඉලක්ක කර ගනිමින් මිසයිල 50 ක් සහ ඩ්රෝන යානා 300 කට ආසන්න ප්රමාණයක් යොදා ගනිමින් දැවැන්ත ප්රහාරයක් එල්ල කර තිබේ. මෙය පෙබරවාරි 3 වනදායින් පසු එක් රාත්රියකදී එල්ල වූ දරුණුතම ප්රහාරය ලෙස සැලකෙන අතර, කියෙව් අගනුවර ආසන්නයේදී ද පුද්ගලයෙකු මිය ගොස් අට දෙනෙකු තුවාල ලබා ඇත. රුසියාවේ මෙම ප්රහාර ප්රධාන වශයෙන් බලශක්ති යටිතල පහසුකම්, දුම්රිය සහ ජල සැපයුම් ජාල වෙත එල්ල වී ඇති බව ජනාධිපති සෙලෙන්ස්කි වැඩිදුරටත් සඳහන් කළේය.
මෙම ප්රහාර මාලාව අතරතුර උතුරු යුක්රේනයේ පිහිටි ඇමරිකානු බහුජාතික සමාගමක් වන ‘මොන්ඩෙලෙස්’ (Mondelēz) සතු කර්මාන්ත ශාලාවකට ද රුසියානු මිසයිල ප්රහාරයක් එල්ල වී ඇත. විදේශ අමාත්ය ඇන්ඩ්රි සිබිහා අවධාරණය කළේ මෙය හමුදා ඉලක්කයක් නොවන අතර සාමාන්ය වැසියන් සේවය කරන ආර්ථිකයට දායක වන ස්ථානයක් බවයි. රුසියාව ද තමන් වෙත යුක්රේන ඩ්රෝන ප්රහාර එල්ල වූ බව පවසමින් මොස්කව්හි ගුවන්තොටුපළ හතරක ගුවන් ගමන් සීමා කිරීමට පියවර ගෙන තිබුණි.
