ප්රංශ ජනාධිපති එමානුවෙල් මැක්රොන් (Emmanuel Macron) ජපානයේ සිදු කළ නිල සංචාරය අතරතුර, යුරෝපයේ පවතින “පුරෝකථනය කළ හැකි” (Predictability) ස්ථාවරත්වය අගය කළ අතර එය ඇමෙරිකානු ජනාධිපති ඩොනල්ඩ් ට්රම්ප්ගේ හදිසි තීරණවලට එල්ල කළ වක්ර ප්රහාරයක් ලෙස විචාරකයෝ හඳුන්වති. ඉරානය සමඟ පවතින යුද්ධයට සහාය නොදක්වන බවට ට්රම්ප් විසින් ප්රංශයට එල්ල කළ චෝදනාවලින් පසුව මැක්රොන් මෙම අදහස් පළ කර තිබේ.
ටෝකියෝ නුවරදී ජපන් ව්යාපාරික නායකයන් අමතමින් මැක්රොන් ප්රකාශ කළේ, ඇතැම් රටවල් සිය මිත්ර පාර්ශවයන් පවා දැනුවත් නොකර ගන්නා තීරණ මගින් හානි සිදු කළ හැකි වුවද, යුරෝපය සැමවිටම සිය ස්ථාවරය පැහැදිලිව පවත්වා ගන්නා බවයි. විශේෂයෙන්ම ඇමෙරිකාව සහ ඊශ්රායලය විසින් ආරම්භ කරන ලද ඉරාන යුද්ධයට ප්රංශය මුල සිටම සම්බන්ධ නොවූ බවත්, ඒ පිළිබඳව තමන්ගෙන් උපදෙස් ලබා නොගත් බවත් ඔහු අවධාරණය කළේය. යුද ආධාර රැගත් ගුවන් යානා ප්රංශ ගුවන් සීමාව හරහා ගමන් කිරීමට අවසර නොදීම සම්බන්ධයෙන් ට්රම්ප් පසුගියදා ප්රංශය දැඩි ලෙස විවේචනය කර තිබුණි.
හෝමූස් සමුද්ර සන්ධිය වැසී යාම හේතුවෙන් ජපානය වැනි රටවල බලශක්ති අවශ්යතාවලට එල්ල වී ඇති බලපෑම පිළිබඳව ද මෙහිදී අවධානය යොමු විය. ජපන් අගමැතිනී සනායි ටකායිචි (Sanae Takaichi) සමඟ පැවැති සාකච්ඡාවලදී මැක්රොන් වැඩිදුරටත් කියා සිටියේ, ලෝකය නොසන්සුන් කාල පරිච්ඡේදයක් පසු කරන මොහොතක යුරෝපය වැනි ස්ථාවර සහ විශ්වාසදායක සහකරුවෙකු සිටීම අතිශය වැදගත් බවයි.
