මැදපෙරදිග කලාපය පුරා ඉරානය සහ ඔවුන්ගේ හිතවාදී කණ්ඩායම් විසින් එල්ල කරනු ලබන “පිළිගත නොහැකි” ප්රහාර වහාම නතර කරන ලෙස ප්රංශ ජනාධිපති එමානුවෙල් මැක්රෝන්, ඉරාන ජනාධිපති මසූඩ් පෙසෙෂ්කියන් (Massoud Pezeshkian) හට දැනුම් දී තිබේ. දුරකථන සංවාදයකින් අනතුරුව ‘X’ පණිවුඩයක් නිකුත් කරමින් මැක්රෝන් අවධාරණය කළේ ලෙබනනය සහ ඉරාකය ඇතුළු රටවලට එල්ල කරන මෙම ප්රහාර කලාපයම මහා අවුලකට ඇද දමන බවයි.
ගෝලීය බොරතෙල් ප්රවාහනයේ තීරණාත්මක මාවතක් වන හෝමුස් සමුද්ර සන්ධියේ (Strait of Hormuz) නාවික ගමනාගමන නිදහස වහාම තහවුරු කළ යුතු බව ද මෙහිදී ප්රංශ ජනාධිපතිවරයා ප්රකාශ කළේය. ඉරානයේ න්යෂ්ටික වැඩසටහන සහ මිසයිල ප්රහාර පාලනය කෙරෙන නව දේශපාලනික සහ ආරක්ෂක රාමුවක් කලාපයට අත්යවශ්ය බවත්, ඉරානය විසින් රඳවාගෙන සිටින ප්රංශ ජාතිකයන් දෙදෙනෙකු වහාම නිදහස් කළ යුතු බවත් ඔහු වැඩිදුරටත් කියා සිටියේය.
මේ අතර, ඉරාන විප්ලවීය ආරක්ෂක බලකාය (IRGC) ප්රකාශ කර ඇත්තේ ඉරිදා අලුයම තමන් විසින් එල්ල කරන ලද මිසයිල සහ ඩ්රෝන ප්රහාරවලින් කලාපයේ පිහිටි අමෙරිකානු ගුවන් කඳවුරු හතරකට දැඩි හානි සිදුව ඇති බවයි. චන්ද්රිකා ඡායාරූපවලට අනුව එම කඳවුරුවල උපායමාර්ගික රේඩාර් සහ වැදගත් මධ්යස්ථානවලින් 80%කට වඩා විනාශ වී ඇති බවට ද ඉරානය පවසයි.
