නිව්යෝර්ක් අධිකරණයක් හමුවේ මත්ද්රව්ය ජාවාරම් චෝදනා මත සිරගත කර සිටින වෙනිසියුලාවේ හිටපු ජනාධිපති නිකොලස් මදුරෝ සහ ඔහුගේ බිරිඳ වන සිලියා ෆ්ලෝරස්ගේ නීතිමය ගාස්තු ගෙවීම සඳහා වෙනිසියුලානු රජයේ මුදල් භාවිත කිරීමට පනවා ඇති බාධා පිළිබඳව ඇමෙරිකානු විනිසුරු ඇල්වින් හෙලර්ස්ටයින් (Alvin Hellerstein) ට්රම්ප් පරිපාලනයෙන් ප්රශ්න කර තිබේ. පසුගිය ජනවාරි මාසයේදී ඇමෙරිකානු හමුදා මෙහෙයුමකින් මදුරෝ අත්අඩංගුවට ගැනීමෙන් පසු දෙරට අතර රාජ්යතාන්ත්රික සබඳතා යම් මට්ටමකට යථා තත්ත්වයට පත්වෙමින් පවතින පසුබිමක, මෙම සම්බාධක තවදුරටත් පවත්වා ගන්නේ මන්දැයි විනිසුරුවරයා විමසා ඇත.
මදුරෝගේ නීතිඥයන් තර්ක කරන්නේ රජයේ මුදල් ලබාගැනීමට ඉඩ නොදීම හරහා සිය සේවාදායකයාගේ ව්යවස්ථාපිත අයිතිවාසිකම් උල්ලංඝනය වන බවයි. ඇමෙරිකාව මේ වන විටත් වෙනිසියුලාවේ තෙල් කර්මාන්තය සඳහා පනවා තිබූ සම්බාධක ලිහිල් කර ඇති අතර කැරකස් (Caracas) අගනුවර වෙත රාජ්යතාන්ත්රික නිලධාරියෙකු ද පිටත් කර යවා තිබේ. සිරකරුවන් සඳහා නියමිත නිල ඇඳුමෙන් සැරසී අධිකරණය හමුවේ පෙනී සිටි මදුරෝ සහ ඔහුගේ බිරිඳ දෙස බොහෝ පිරිසකගේ අවධානය යොමු වූ අතර, වෙනිසියුලාව තුළ ද මෙම නඩු විභාගය සජීවීව නිරීක්ෂණය කිරීමට රජය විසින් පහසුකම් සලසා තිබුණි.
