සම්බුද්ධ ශාසනයට, මහා සංඝරත්නයට සහ බෞද්ධ සංස්කෘතියට එරෙහිව එල්ල වන විවිධ තර්ජන පරාජය කිරීමේ අරමුණින් මෙම මස 20 වැනිදා කොළඹ 07, බෞද්ධ මහා සම්මේලන පරිශ්රය ඉදිරිපිටදී මහා සඟ සමුළුවක් පැවැත්වීමට කටයුතු යොදා තිබේ. මව්බිම සුරැකීමේ සංවිධානයේ සභාපති මුරුත්තෙට්ටුවේ ආනන්ද හිමියන් පෙන්වා දෙන්නේ ජාතිය, ආගම සහ සංස්කෘතිය වෙනුවෙන් පෙනී සිටින මෙම සමුළුව කිසිදු දේශපාලන අරමුණක් වෙනුවෙන් පවත්වන්නක් නොවන බවයි. නාරාහේන්පිට අභයාරාමයේදී පැවැති මාධ්ය හමුවකදී උන්වහන්සේ අවධාරණය කළේ පක්ෂ විපක්ෂ භේදයකින් තොරව ඕනෑම දේශපාලනඥයෙකුට හෝ සිවිල් පුරවැසියෙකුට මේ සඳහා සහභාගි විය හැකි බවයි.
මෙම මහා සංඝ සම්මේලනය සඳහා ත්රිනිකායික මහනායක හිමිවරුන් ඇතුළු නිකායන් තුනේම උත්තරීතර සංඝ සභාවන් වෙත නිල වශයෙන් ආරාධනා කර ඇති බව තිනියාවල පාලිත හිමියෝ මෙහිදී සඳහන් කළහ. විශේෂයෙන්ම සමාජ මාධ්ය හරහා සහ ඇතැම් පිරිස් විසින් බෞද්ධ භික්ෂුවට එරෙහිව ගෙන යන සංවිධානාත්මක ප්රහාර හමුවේ සඟ සමුළුවක අවශ්යතාව මතුව ඇති බව පෙන්වා දෙන උන්වහන්සේලා, මින් ඉදිරියේදී දසරාජ ධර්මයට අනුව රට පාලනය කරන ඕනෑම නායකයෙකුට මහා සංඝරත්නයේ ආශිර්වාදය හිමිවන බව ද ප්රකාශ කළහ. බෞද්ධ මහා සම්මේලනයේ සභාපති චන්ද්රා වාකිෂ්ඨ සහ කොළඹ තරුණ බෞද්ධ සංගමයේ සභාපති මහේන්ද්ර ජයසේකර යන මහත්වරුන් ද මෙම වැඩපිළිවෙළ සඳහා සිය සහයෝගය පළ කර තිබේ.
