හිටපු ජනාධිපති රනිල් වික්රමසිංහ මහතාගේ බිරිඳ වන මහාචාර්ය මෛත්රී වික්රමසිංහ මහත්මිය, අපරාධ පරීක්ෂණ දෙපාර්තමේන්තුවේ මූල්ය අපරාධ විමර්ශන කොට්ඨාසය (FCID) හමුවේ පෙනී සිටීමට අද (20) දින ලබා දී තිබූ අවස්ථාව මගහැර තිබේ. සෞඛ්ය හේතූන් මත තමන්ට අද දින පැමිණිය නොහැකි බව ඇය විසින් බලධාරීන් වෙත දැනුම් දී ඇත.
2023 වසරේදී හිටපු ජනාධිපති රනිල් වික්රමසිංහ මහතා බ්රිතාන්යයේ සිදු කළ පෞද්ගලික සංචාරයක් වෙනුවෙන් රුපියල් ලක්ෂ 166කට අධික රාජ්ය මුදල් අනුමත කිරීම හරහා මුදල් සාවද්ය පරිහරණය කළ බවට මෙම විමර්ශනය ක්රියාත්මක වේ. අදාළ සංචාරය මෛත්රී වික්රමසිංහ මහත්මියගේ උපාධි ප්රදානෝත්සවයකට සහභාගී වීම සඳහා සිදු කරන ලද්දක් බවට විමර්ශන කණ්ඩායම් සැක පළ කරයි.
මෙම සිද්ධියට අදාළව රාජ්ය මුදල් අවභාවිත කිරීමට ආධාර අනුබල දුන් බවට හිටපු ජනාධිපති ලේකම් සමන් ඒකනායක මහතාට ද චෝදනා එල්ල වී තිබේ. අතිරේක සොලිසිටර් ජෙනරාල් දිලිප පීරිස් මහතා පසුගියදා අධිකරණයට දන්වා සිටියේ, මෙම සිද්ධිය සම්බන්ධයෙන් ප්රකාශයක් ලබා ගැනීම සඳහා කොල්ලුපිටිය පොලිසිය මාර්ගයෙන් මෛත්රී වික්රමසිංහ මහත්මියට අද දින කැඳවීම් කර ඇති බවයි.
කෙසේ වෙතත්, ඇය අද දින නොපැමිණීම හේතුවෙන් ඉදිරි දිනයකදී ප්රකාශයක් ලබා ගැනීමට විමර්ශන නිලධාරීන් කටයුතු කරනු ඇතැයි වාර්තා වේ.
