නීති විරෝධී මත්පැන් ජාවාරමක නිරතව සිටි පුද්ගලයෙකු, පොලිස් ස්ථානාධිපතිවරයා කළ මානුෂීය ඉල්ලීමකට ගරු කරමින් එම ජාවාරම සම්පූර්ණයෙන්ම නවතා දැමූ පුවතක් දඹුල්ල, තිත්තවැල්ගොල්ල ප්රදේශයෙන් වාර්තා වේ. කලක සිට මෙම ජාවාරම සිදුකරගෙන ගොස් ඇති මොහු, අද (26) දින තමා සන්තකයේ තිබූ මත්පැන් නිෂ්පාදන උපකරණ සියල්ල පොලිසිය වෙත ගෙනවිත් භාර දීමට කටයුතු කර තිබේ.
දඹුල්ල මූලස්ථාන පොලිසියේ ස්ථානාධිපති සුගත් විජේසුන්දර මහතා, අදාළ ප්රදේශයේ ජාවාරම්කරුවන් හමු වී මෙම විනාශකාරී ව්යාපාරය නවතා දමන ලෙස පෞද්ගලිකව කළ ඉල්ලීමක් මෙලෙස සාර්ථක වී ඇත. දඹුල්ල නගරාධිපති වසන්ත රාජ මන්ත්රී මහතා සහ ප්රදේශවාසීන් ඉදිරියේ එම පුද්ගලයා සිය ජාවාරම අතහැර දැමීමට තීරණය කළ බව දසත නිවුස් වාර්තාකරු සඳහන් කළේය.
පොලිස් වැටලීම්වලින් පමණක් මර්දනය කළ නොහැකි වූ මෙම නීති විරෝධී ක්රියාව, නිලධාරියෙකුගේ මඟපෙන්වීම සහ අවවාද මත ස්වකැමැත්තෙන්ම අත්හැර දැමීම සමාජයට මහඟු ආදර්ශයක් බව ප්රදේශවාසීන් පවසති. මෙම තැනැත්තාගේ තීරණය අගය කළ පොලිස් ස්ථානාධිපතිවරයා, ඉදිරියේදී යහපත් ජීවනෝපායක් සඳහා යොමු වීමට ඔහුට දිරිගැන්වීම් ලබා දී ඇත.
