මිනිසා සහ බල්ලා අතර පවතින සුවිශේෂී බැඳීම අලුත් කරමින් කළුතර විද්යාලයේ ක්රීඩා උත්සවයේදී කාගේත් අවධානය දිනාගත් “මනුල” නම් සුනඛයා පිළිබඳ පුවත මේ දිනවල සමාජ මාධ්ය තුළ මහත් ආන්දෝලනයක් ඇති කර තිබේ. පාසලේ තුර්යවාදක කණ්ඩායම (Band) වාදනය කරන විට ඊට හඬ මුසු කරමින් “සින්දු කියන” මෙම අපූරු සත්ත්වයා පිළිබඳව විද්යාලයේ බටහිර තුර්යවාදක කණ්ඩායම භාර ඉෂාරා ධනංජලී ගුරුතුමිය ඇතුළු පිරිස හෙළි කළ තොරතුරු අතිශය සංවේදීය.
කොවිඩ් වසංගත සමයෙන් පසුව පාසලට පැමිණි මෙම සුනඛයා, ශිෂ්යභට සහ තුර්යවාදක කණ්ඩායමේ දරුවන් සමඟ සමීප මිත්රත්වයක් ගොඩනගාගෙන ඇත. දරුවන් විසින් “මනුල”, “සමන්ත” හෝ “සිරිමත්” ලෙස හඳුන්වන මොහු, කණ්ඩායම පුහුණුවීම් ආරම්භ කරන සැණින් කොහේ සිටියත් දුවගෙන එන්නේ තමාට නොකියා පුහුණුවීම් ඇරඹුවාදැයි අසන්නාක් මෙනි. සංගීත භාණ්ඩ වාදනය කරන විට ඌ ද ඒ හා සමානව තාලයට හඬ නැගීම කාගේත් මවිතයට කරුණකි.
විද්යාලයේ ගුරුවරුන් සහ අනධ්යයන කාර්ය මණ්ඩලය මනුලට දක්වන්නේ පුදුමාකාර ආදරයකි. විශේෂයෙන් නදීකා සහ දුමින්ද යන ගුරු මහත්මීන් නිවසේ සිටම බිත්තර, මාළු සහ මස් මිශ්ර ආහාර මනුල වෙනුවෙන් රැගෙන එති. විද්යාලයේ විදුහල්පතිවරුන් සහ PHI මහත්වරුන් මැදිහත් වී මනුලට අවශ්ය එන්නත් ලබා දී සුරක්ෂිත කර ඇති අතර, රාත්රී කාලයේ පුහුණුවීම් අවසන් කරන දරුවන්ව බස් රථයට ඇරලවා ඒමට තරම් මනුල බුද්ධිමත්ය.
පසුගියදා පැවැති ක්රීඩා උත්සවයේදී මනුල විශේෂ අවධානයක් දිනාගත්තේ තුර්යවාදක කණ්ඩායමේ වර්ණය වන කොළ පැහැති “බෝ” (Bow) එකක් සහිත ඇඳුමකින් සැරසී සිටීම නිසාය. එහිදී කණ්ඩායම් නායකයා අමුත්තන්ට ආචාර කරන විට මනුල ද හිස හරවා ආචාර කිරීමත්, මුළු සංදර්ශනය පුරාම කණ්ඩායම සමඟ විනයානුකූලව ගමන් කිරීමත් නිසා ඌ එදින සැමගේ වීරයා බවට පත් විය.
