ඉරානයේ බැලස්ටික් මිසයිල වැඩසටහන සහ නාවික හමුදාව ඉලක්ක කරගනිමින් ඇමෙරිකානු හමුදාව එල්ල කරන ප්රහාර ඉදිරි දිනවලදී තවදුරටත් දැඩි කරන බව ඇමෙරිකානු රාජ්ය ලේකම් මාර්කෝ රුබියෝ (Marco Rubio) අනතුරු අඟවයි. ඉකුත් දින කිහිපය තුළ එල්ල වූ ප්රහාර මගින් ඉරානයේ නායකත්වය සහ මිසයිල පද්ධති ඉලක්ක කළ බව පැවසූ ඔහු, මෙතෙක් එල්ල කළ ප්රහාරවලට වඩා “දැඩි සහ දඬුවම් සහගත” (Punishing) ප්රහාර මාලාවක් ඉදිරි අදියරේදී ක්රියාත්මක වන බව කොංග්රස් මණ්ඩල සාමාජිකයන් දැනුවත් කරමින් ප්රකාශ කළේය.
මෙම මිලිටරි මෙහෙයුමේ ප්රධාන අරමුණ වන්නේ ඉරානයේ බැලස්ටික් මිසයිල ශක්තිය, ප්රහාරක ඩ්රෝන යානා සහ නාවික බලඇණිය සම්පූර්ණයෙන්ම විනාශ කිරීම බව රුබියෝ සඳහන් කළේය. ඉරානය සිය න්යෂ්ටික අභිලාෂයන් ආරක්ෂා කර ගැනීමට මෙම මිසයිල පද්ධතිය පලිහක් ලෙස භාවිත කරන බවට ඔහු චෝදනා කළේය. එසේම, ඉරානයෙන් ඇමෙරිකාවට එල්ල වීමට තිබූ “ඉතා ආසන්න තර්ජනය” (Imminent Threat) සැලකිල්ලට ගෙන ජනාධිපති ට්රම්ප් ගත් මෙම තීරණය සඳහා කොංග්රස් මණ්ඩලයේ විශේෂ අනුමැතියක් අවශ්ය නොවන බව ද ඔහු අවධාරණය කළේය.
කෙසේ වෙතත්, ඩිමොක්රටික් පක්ෂයේ සෙනෙට් සභිකයන් මෙම ප්රහාර සාධාරණීකරණය කිරීමට ඉදිරිපත් කළ කරුණු ප්රමාණවත් නොවන බව පවසා තිබේ. විශේෂයෙන්ම මෙම යුද්ධයෙන් ඉවත් වීමේ සැලසුම (Exit Plan) කුමක්ද යන්න සහ ඇමෙරිකාවට එල්ල වීමට තිබූ සැබෑ තර්ජනය කුමක්ද යන්න පිළිබඳව ඔවුන් ප්රශ්න කර ඇත. ඉරානයේ පාලන තන්ත්රය වෙනස් කිරීම (Regime Change) සිය අරමුණ නොවන බව රුබියෝ පැවසුවද, දැනටමත් ඉරාන උත්තරීතර නායකයා ඇතුළු ජ්යෙෂ්ඨ නායකයන් රැසක් ප්රහාරවලින් මියගොස් සිටීම විශේෂත්වයකි. මේ වන විට ඉරානය සමඟ කිසිදු රාජ්යතාන්ත්රික මට්ටමේ සාකච්ඡාවක් සිදු නොවන බව ද වාර්තා වේ.
