ෆේස්බුක් සහ ඉන්ස්ටග්රෑම් හිමිකාරීත්වය දරන මෙටා (Meta) සමාගමේ ප්රධානී මාර්ක් සකර්බර්ග්, කුඩා දරුවන් හිතාමතාම සමාජ මාධ්යවලට ඇබ්බැහි කරවීමේ චෝදනා සම්බන්ධයෙන් පසුගිය බදාදා (පෙබරවාරි 18) ලොස් ඇන්ජලීස් අධිකරණය හමුවේ පෙනී සිටියේය. සකර්බර්ග් ජූරි සභාවක් ඉදිරියේ සාක්ෂි ලබා දුන් පළමු අවස්ථාව මෙය ලෙස ඉතිහාසයට එක් වේ.
නඩු විභාගයේදී අනාවරණය වූ ප්රධාන කරුණු කිහිපයක් මෙසේය. පැමිණිලිකාර පාර්ශවයේ නීතිඥ මාර්ක් ලැනියර් විසින් 2019 වසරේ මෙටා සමාගමේ අභ්යන්තර ඊමේල් පණිවිඩ සහ පර්යේෂණ වාර්තා කිහිපයක් අධිකරණයට ඉදිරිපත් කළේය. එම වාර්තාවල සඳහන් වූයේ ඉන්ස්ටග්රෑම් භාවිත කරන නව යොවුන් දරුවන් එයින් තමන්ට හානියක් සිදුවන බව දැන දැනත් එයට දැඩි ලෙස ඇබ්බැහි වී ඇති බවයි. වයස අවුරුදු 13ට අඩු දරුවන්ට ඉන්ස්ටග්රෑම් තහනම් බව සමාගම පැවසුවද, ඇමරිකාවේ වයස අවුරුදු 10-12 අතර දරුවන්ගෙන් 30%ක් පමණ දැනටමත් එය භාවිත කරන බව එම ලිපිගොනු මඟින් හෙළි විය.
එමෙන්ම 2015 වසරේදී සකර්බර්ග් විසින් සිය විධායක නිලධාරීන්ට ලබා දුන් උපදෙස් මාලාවක, පරිශීලකයින් ඉන්ස්ටග්රෑම් තුළ ගත කරන කාලය 12%කින් වැඩි කිරීමට ඉලක්ක ලබා දී තිබූ බව ද මෙහිදී අනාවරණය විය. කෙසේ වෙතත් මෙම ලේඛන වැරදි ලෙස අර්ථකථනය කර ඇති බවත්, පරිශීලකයින් ගත කරන කාලය මැන බලන්නේ සේවාවේ ගුණාත්මකභාවය තක්සේරු කිරීමට මිස ඇබ්බැහි කරවීමට නොවන බවත් සකර්බර්ග් අධිකරණය හමුවේ ප්රකාශ කළේය. “අවුරුදු 13ට අඩු දරුවන් හඳුනා ගැනීමට මීට වඩා වේගයෙන් කටයුතු කිරීමට නොහැකි වීම ගැන මා කනගාටු වෙනවා,” යැයි ඔහු එහිදී සඳහන් කළේය.
මෙම නඩුව ගොනු කර ඇත්තේ දැනට 20 හැවිරිදි වියේ පසුවන ‘K.G.M’ ලෙස හඳුන්වන තරුණියකි. කුඩා කල සිටම ඉන්ස්ටග්රෑම් සහ යූටියුබ් භාවිතයට ඇබ්බැහි වීම නිසා තමා විශාදය (Depression) සහ සියදිවි නසාගැනීමේ සිතුවිලිවලින් පීඩා විඳි බව ඇය චෝදනා කරයි. මීට පෙර ඇමරිකානු සෙනෙට් මණ්ඩලය හමුවේ ද සකර්බර්ග් මෙවැනිම ප්රශ්න කිරීම්වලට ලක් වූ නමුත්, ජූරි සභාවක් හමුවේ සාක්ෂි දීමට සිදු වීම මෙම නඩුවේ ඇති විශේෂත්වයයි.
