2025 වසරේ අගභාගයේදී ඇති වූ ‘ඩිට්වා’ (Ditwah) සුළි කුණාටුවෙන් සිදු වූ දැඩි හානි හේතුවෙන්, තුල්හිරිය MAS ෆැබ්රික් පාර්ක් (MFP) පරිශ්රයේ පිහිටි සිය ප්රමුඛතම “තුරුලිය” කර්මාන්තශාලාවේ නිෂ්පාදන කටයුතු වෙනත් ආසන්න පහසුකම් වෙත ගෙන යාමට තීරණය කළ බව MAS කළමනාකාරීත්වය අද (2026 මාර්තු 16) නිවේදනය කළේය. තාක්ෂණික ඇගයීම්වලට අනුව, අදාළ භූමිය පහත් බිමක පිහිටා තිබීම සහ අවට ජලාශවලට සමීප වීම නිසා නැවත නැවතත් ගංවතුර තර්ජනයන්ට ලක්වීමේ ඉහළ අවදානමක් පවතින බැවින්, සේවකයින්ගේ ආරක්ෂාව වෙනුවෙන් මෙම පියවර ගෙන තිබේ.
තුරුලිය කර්මාන්තශාලාවේ සේවය කරන සියලුම සේවකයින්ට MAS සමූහයේ අනෙකුත් කර්මාන්තශාලාවල සේවය කිරීමට අවස්ථාව සලසා දී ඇති අතර, ඒ සඳහා මාරු වන සේවකයින්ට මාස තුනක වැටුප් දිරි දීමනාවක් ලබා දීමට ද කළමනාකාරීත්වය තීරණය කර ඇත. දැනටමත් සේවකයින් 500කට අධික පිරිසක් වෙනත් ස්ථානවල තාවකාලිකව සේවයේ යෙදී සිටින අතර, ඉතිරි 1,600කට අධික සේවකයින් සමඟ සාකච්ඡා කර ඔවුන්ට සුදුසු සේවා ස්ථාන ලබා දීමට MAS සමාගම කැපවී සිටී. යම් හෙයකින් සේවා ස්ථානය මාරු කිරීමට අපහසු සේවකයින් සඳහා නීත්යානුකූල අවශ්යතාවලට වඩා වැඩි වන්දි පැකේජයක් සහ අනෙකුත් ප්රතිලාභ ලබා දීමට ද පියවර ගෙන ඇත.
තුරුලිය යනු MAS සමාගමට පමණක් නොව ලෝක ඇඟලුම් ක්ෂේත්රයටම සුවිශේෂී සන්ධිස්ථානයකි. එය ලොව ප්රථම වරට LEED ප්ලැටිනම් සහතිකය (LEED Platinum certification) ලැබූ, පරිසර හිතකාමී ලෙස විශේෂයෙන් නිර්මාණය කරන ලද ඇඟලුම් කර්මාන්තශාලාවයි. හරිත වහලක්, ස්වභාවික ආලෝකය සහ වාතාශ්රය මෙන්ම 2008 වසරේදී මෙරට ප්රථම වරට වහල මත සවිකළ සූර්ය පැනල පද්ධතියක් ද මෙහි ස්ථාපිත කර තිබුණි. දේශගුණික විපර්යාස නිසා ඇති වන ස්වභාවික ව්යසන හමුවේ මෙවැනි සුවිශේෂී පාරිසරික උරුමයක් සහිත ස්ථානයක මෙහෙයුම් නතර කිරීමට සිදුවීම කණගාටුදායක තත්ත්වයක් බව සමාගම වැඩිදුරටත් පවසා සිටී.
