ලොව ප්රකට ඉතාලි ජාතික කලාකරුවෙකු වන මොරිසියෝ කැටෙලාන්, මෙවර පාස්කු මංගල්යයට සමගාමීව ලොව පුරා සිටින ඕනෑම අයෙකුට තම පාපයන් ප්රකාශ කළ හැකි විශේෂ “හොට්ලයින්” (Hotline) සේවාවක් ආරම්භ කර තිබේ. දෙවන ජෝන් පෝල් පාප්තුමා අභාවප්රාප්ත වී වසර 21ක් සපිරීම නිමිත්තෙන් ඔහු මෙම අමුතුම ආකාරයේ කලා නිර්මාණය ලොවට ඉදිරිපත් කර ඇත.
අද (02) සිට සති තුනක කාලයක් ක්රියාත්මක වන මෙම සේවාව හරහා ඕනෑම අයෙකුට දුරකථන ඇමතුමක් මගින් හෝ වට්ස්ඇප් (WhatsApp) හඬ පණිවිඩයක් මගින් තමන් කළ වැරදි පාපොච්චාරණය කළ හැකිය. “පව්කාරයන්ගේ ක්ෂණික ඇමතුම් සේවාව” ලෙස හැඳින්වෙන මෙහි අරමුණ වන්නේ පාස්කු ඉරිදාට පෙර මිනිසුන්ට තම හෘද සාක්ෂිය සැහැල්ලු කර ගැනීමට අවස්ථාවක් ලබා දීමයි. මීට අමතරව, කැටෙලාන් විසින් මීට පෙර නිර්මාණය කළ වඩාත් ආන්දෝලනාත්මක කලා කෘතියක සීමිත පිටපත් 666ක් ද මෙවර වෙළඳපොළට නිකුත් කර තිබේ.
ඉරාන යුද්ධය සහ මැදපෙරදිග අර්බුදය හමුවේ ලෝකයම පීඩාවට පත්ව සිටින මොහොතක, කැටෙලාන්ගේ මෙම “පාපෝච්චාරණ සේවාව” සමාජ මාධ්ය තුළ දැඩි කතාබහට ලක්ව ඇත. ඇතැමුන් මෙය කලාවේ නව මානයක් ලෙස අගය කළ ද, ආගමික පාර්ශවයන් පවසන්නේ මෙය කිතුනු දහමේ පූජනීය චාරිත්රයන් සමච්චලයට ලක් කිරීමක් බවයි. කෙසේ වෙතත්, නිරන්තරයෙන්ම සමාජය ප්රශ්න කරන නිර්මාණ ඉදිරිපත් කරන කැටෙලාන්, මෙමගින් මිනිස් සන්තානයේ පවතින අභ්යන්තර ගැටුම් නිරූපණය කිරීමට උත්සාහ කර ඇති බව විචාරකයෝ පෙන්වා දෙති.
