ප්රබල අකුණු ඇතිවීමේ අවදානමක් පවතින බැවින් ඒ පිළිබඳව අවධානයෙන් පසුවන ලෙස කාලගුණ විද්යා දෙපාර්තමේන්තුව විසින් ප්රාදේශීය මට්ටමින් අවවාදාත්මක නිවේදනයක් නිකුත් කර තිබේ. දිවයිනේ නිරිතදිග කොටසේ පවතින කාලගුණික වෙනස්වීම් මෙයට ප්රධාන හේතුව වී ඇත.
බස්නාහිර පළාත (කොළඹ, ගම්පහ සහ කළුතර දිස්ත්රික්ක), සබරගමුව පළාත (රත්නපුර සහ කෑගල්ල දිස්ත්රික්ක) මෙන්ම දකුණු පළාත (ගාල්ල, මාතර සහ හම්බන්තොට දිස්ත්රික්ක) මේ යටතේ විශේෂ අවධානයට ලක්විය යුතුය.
අද (20) පස්වරු 2.00න් පසුව එම ප්රදේශවල තැනින් තැන ගිගුරුම් සහිත වැසි වර්ධනය විය හැකි අතර වැසි ඇති වන අවස්ථාවලදී පැයට කිලෝමීටර් 70-80ක් දක්වා වූ තාවකාලික තද සුළං ද ඇතිවිය හැකි බව කාලගුණ විද්යා දෙපාර්තමේන්තුව පෙන්වා දෙයි.
ගිගුරුම් සහිත වැසි පවතින අවස්ථාවලදී එළිමහනේ හෝ ගස් යට රැඳී සිටීමෙන් වළකින ලෙසත්, විශේෂයෙන්ම කුඹුරු, තේ වතු, ක්රීඩා පිටි සහ ජලාශ ආශ්රිතව රැඳී සිටීමෙන් වැළකී සිටිය යුතු බවත් දෙපාර්තමේන්තුව සිහිපත් කරයි. එමෙන්ම ස්ථාවර දුරකථන සහ විදුලියට සම්බන්ධ කර ඇති විද්යුත් උපකරණ භාවිතය සීමා කිරීමත්, බයිසිකල් හෝ ට්රැක්ටර් වැනි විවෘත වාහන භාවිතයෙන් බැහැර වීමත් වැදගත් වේ. හදිසි අවස්ථාවකදී ගොඩනැගිල්ලක් හෝ සංවෘත වාහනයක් තුළ ආරක්ෂාව ලබා ගැනීමට කටයුතු කරන ලෙස මහජනතාවගෙන් ඉල්ලා සිටී.
