ලොව සුප්රකට සමාජ මාධ්ය ජාලයක් වන ෆේස්බුක් (Facebook) හි මව් සමාගම වන මෙටා (Meta) ආයතනය, අන්තර්ගත නිර්මාණකරුවන් (Content Creators) දිරිමත් කිරීම සඳහා “Creator Fast Track” නමින් සුවිශේෂී වැඩපිළිවෙළක් හඳුන්වා දී තිබේ. මෙම නව ව්යාපෘතිය යටතේ සුදුසුකම් ලබන නිර්මාණකරුවන්ට ඔවුන්ගේ Facebook Reels සඳහා ඉහළ ප්රේක්ෂක ප්රතිචාර ලබා ගැනීමට සහාය වන අතරම, මාස තුනක කාලයක් සඳහා සහතික කළ මාසික දීමනාවක් ලබා දීමට ද කටයුතු යොදා ඇත. මෙහි ප්රධාන අරමුණ වන්නේ අනෙකුත් සමාජ මාධ්ය ජාලයන්හි සිටින ජනප්රිය නිර්මාණකරුවන් වැඩි වශයෙන් ෆේස්බුක් වේදිකාව වෙත ආකර්ෂණය කර ගැනීමයි.
මෙම වැඩපිළිවෙළ යටතේ ඉන්ස්ටග්රෑම්, ටික්ටොක් හෝ යූටියුබ් වැනි වේදිකාවල අනුගාමිකයන් (Followers) මිලියනයකට වඩා වැඩි පිරිසක් සිටින නිර්මාණකරුවන්ට මසකට ඩොලර් 3,000 ක් දක්වා උපයා ගත හැකිය. එසේම අවම වශයෙන් අනුගාමිකයන් ලක්ෂයක් (100,000) සිටින නිර්මාණකරුවන්ට මසකට ඩොලර් 1,000 ක සහතික කළ ආදායමක් හිමි වේ. මෙටා ආයතනය සඳහන් කරන පරිදි, මෙම වැඩසටහනට එක්වන පිරිසට ෆේස්බුක් හි මුදල් ඉපයීමේ මෙවලම් (Monetisation tools) සඳහා වහාම ප්රවේශය හිමිවන අතර, වැඩසටහන් කාලසීමාවෙන් පසුව ද අඛණ්ඩව ආදායම් ඉපයීමට ඔවුන්ට අවස්ථාව සැලසේ.
පසුගිය 2025 වසරේදී මෙටා ආයතනය නිර්මාණකරුවන් වෙනුවෙන් ඩොලර් බිලියන 3 කට ආසන්න මුදලක් ගෙවා ඇති අතර, එය පෙර වසරට වඩා සියයට 35 ක සැලකිය යුතු වර්ධනයකි. නිර්මාණකරුවන්ට තම ආදායම වඩාත් නිවැරදිව නිරීක්ෂණය කිරීම සඳහා “Qualified Views” සහ “Earnings Rate” වැනි නව දර්ශක ද හඳුන්වා දී තිබීම විශේෂත්වයකි. මෙම පියවර හරහා ෆේස්බුක් වේදිකාව ලොව ප්රමුඛතම වීඩියෝ අන්තර්ගත ප්රකාශන මධ්යස්ථානයක් බවට පත්කිරීමට මෙටා සමාගම අපේක්ෂා කරයි.
