මැදපෙරදිග කලාපයේ පවතින අමෙරිකානු-ඉශ්රායල සහ ඉරාන යුදමය වාතාවරණය හේතුවෙන් ලෝක වෙළෙඳපොළේ බොරතෙල් මිල අද (04) දින 1% කින් ඉහළ ගොස් තිබේ. හෝමූස් සමුද්ර සන්ධිය හරහා ගමන් කරන තෙල් නැව් සඳහා අමෙරිකානු නාවික හමුදා ආරක්ෂාව ලබා දීමේ හැකියාව පිළිබඳව ජනාධිපති ඩොනල්ඩ් ට්රම්ප් කළ ප්රකාශයත් සමඟ, පෙර දිනවල පැවති ශීඝ්ර මිල ඉහළ යාමේ වේගය යම් ප්රමාණයකට පාලනය වී ඇති බව වාර්තා වේ. ඒ අනුව බ්රෙන්ට් (Brent) බොරතෙල් මිල බැරලයක් ඩොලර් 82.57 දක්වාත්, අමෙරිකානු (WTI) බොරතෙල් මිල ඩොලර් 75.28 දක්වාත් ඉහළ ගොස් ඇත.
වෙළෙඳපොළ විශ්ලේෂකයන් පෙන්වා දෙන්නේ වත්මන් තත්ත්වය තුළ ඉන්වෙන්ටරි දත්ත හෝ සාමාන්ය ආර්ථික දර්ශකවලට වඩා භූ-දේශපාලනික සාධක තෙල් මිල කෙරෙහි ප්රබල ලෙස බලපාන බවයි. ඉරානය විසින් එල්ල කරන ප්රහාර හමුවේ ලෝක තෙල් නිෂ්පාදනයෙන් තුනෙන් එකකට ආසන්න ප්රමාණයක් දායකත්වය සපයන මැදපෙරදිග බලශක්ති යටිතල පහසුකම්වලට දැඩි තර්ජනයක් එල්ල වී තිබේ. ඕපෙක් (OPEC) සංවිධානයේ දෙවන විශාලතම නිෂ්පාදකයා වන ඉරාකය, අපනයන මාර්ග අවහිර වීම සහ ගබඩා කිරීමේ සීමාවන් නිසා සිය දෛනික නිෂ්පාදනයෙන් අඩක් පමණ වන බැරල් මිලියන 1.5 ක් කපා හැරීමට පියවර ගෙන ඇත.
ලෝකයේ තෙල් සහ ස්වභාවික වායු ප්රවාහනයෙන් පහෙන් පංගුවක් සිදුවන හෝමූස් සමුද්ර සන්ධිය හරහා නාවික ගමනාගමනය දැනට අඩාල වී ඇති අතර, ඒ සඳහා ආරක්ෂාව සැපයීමට සහ නාවික වෙළෙඳාම වෙනුවෙන් මූල්ය ඇපකර ලබා දීමට අමෙරිකානු රජය ඉදිරිපත් වී තිබේ. ඉන්ෂුවරන්ස් සමාගම් යුද අවදානම් ආවරණයන් අවලංගු කරමින් සිටින පසුබිමක ජනපති ට්රම්ප්ගේ මෙම තීරණය සහනයක් වුවද, නාවික ආරක්ෂක පද්ධතියක් ස්ථාපිත කිරීමට යම් කාලයක් ගතවනු ඇතැයි ආර්ථික විද්යාඥයෝ පවසති. මේ අතර ඉන්දියාව, ඉන්දුනීසියාව සහ චීනය වැනි රටවල් සිය බලශක්ති අවශ්යතා සපුරා ගැනීම සඳහා විකල්ප මාර්ග සහ සැපයුම්කරුවන් සෙවීමට මේ වන විටත් කටයුතු කරමින් සිටී.
