මැදපෙරදිග කලාපයේ පවතින අමෙරිකා-ඉරාන යුද වාතාවරණය සමනය කිරීම සඳහා සුදුසු “ගනුදෙනුකරුවෙකු” (Dealmaker) සොයමින් සිටින වොෂින්ටන් බලධාරීන්ගේ අවධානය මේ වන විට ඉරාන පාර්ලිමේන්තු කථානායක මොහොමඩ් බගර් කලීබාෆ් වෙත යොමුව ඇති බව අද (2026 මාර්තු 25) වෝල් ස්ට්රීට් ජර්නල් (WSJ) වාර්තා පෙන්වා දෙයි. දැඩි මතධාරී දේශපාලනඥයෙකු ලෙස ප්රකට වුවද ප්රායෝගික තීන්දු ගන්නෙකු ලෙස කලීබාෆ් හඳුනාගෙන තිබීම මෙයට හේතුව වන අතර ඔහු ඉරාන ඉස්ලාමීය විප්ලවීය ආරක්ෂක බලකායේ (IRGC) ගුවන් හමුදා අණදෙන නිලධාරියෙකු ලෙස මෙන්ම ටෙහෙරාන් නුවර නවීකරණය කළ හිටපු නගරාධිපතිවරයා ලෙස ද අත්දැකීම් බහුල අයෙකි.
අමෙරිකාව සමඟ දැනට කිසිදු සෘජු සාකච්ඡාවක් සිදු නොවන බව පවසන කලීබාෆ් ජනාධිපති ට්රම්ප්ගේ ප්රකාශයන් විවේචනය කර තිබුණද ඉරානයේ උත්තරීතර නායකයාගේ අනුමැතිය ඇතිව ඕනෑම තීරණාත්මක සාකච්ඡාවකට මැදිහත් විය හැකි ප්රබල චරිතයක් ලෙස ඔහු සැලකේ. ඉරානය තුළ “ශක්තිමත් නායකයෙකු” ලෙස නැගී එන ඔහු වත්මන් යුද වාතාවරණය හමුවේ ඉරානයේ ආරක්ෂාව සහ ආර්ථිකය ස්ථාවර කිරීමට සමත් අයෙකු ලෙස එරට පාලක පන්තිය තුළ පිළිගැනීමක් ලබා ඇත. අමෙරිකානු ජනාධිපති ඩොනල්ඩ් ට්රම්ප් සාම සැලසුමක් ඉදිරිපත් කර ඇති පසුබිමක කලීබාෆ් වැනි ප්රායෝගික නායකයෙකු හරහා මෙම යුද්ධය අවසන් කිරීමට මගක් විවෘත වනු ඇතැයි විදේශ රාජ්ය තාන්ත්රිකයෝ බලාපොරොත්තු පළ කරති.
