ඇමෙරිකාව, ඉරානය සහ ඉශ්රායලය අතර පවතින දරුණු යුද ගැටුම් හේතුවෙන් මේ වන විට මැදපෙරදිග කලාපයේ රටවල් 12ක් සෘජු යුද බලපෑමට ලක්ව ඇති බව අල්-ජසීරා පුවත් සේවයේ නවතම දත්ත වාර්තා (Live Tracker) අනාවරණය කරයි. 2026 මාර්තු 13 වන දින GMT වේලාවෙන් 11:45 වන විට තහවුරු කර ඇති දත්තවලට අනුව, සමස්ත කලාපය පුරා සිදුව ඇති ජීවිත හානි සංඛ්යාව 2,200 ඉක්මවා ගොස් තිබේ.
මෙම ගැටුම්වලදී වැඩිම හානියක් සිදුව ඇත්තේ ඉරානයට වන අතර, ඇමෙරිකානු සහ ඉශ්රායල ප්රහාරවලින් එරට පුද්ගලයින් 1,444 දෙනෙකු මියගොස් 18,551 දෙනෙකු තුවාල ලබා ඇත. ලෙබනනය දෙවනුවට වැඩිම හානියක් සිදුවූ රට බවට පත්ව ඇත්තේ පුද්ගල මරණ 687ක් සහ තුවාලකරුවන් 1,774ක් වාර්තා කරමිනි. ඉරානය විසින් එල්ල කළ ප්රහාර හේතුවෙන් ඉශ්රායලයේ පුද්ගල මරණ 15ක් සහ තුවාලකරුවන් 2,000කට අධික සංඛ්යාවක් වාර්තා වන අතර, ඉරාකයේ මරණ 27ක් සටහන් වී තිබේ. මෙම මෙහෙයුම්වල නිරතව සිටින ඇමෙරිකානු හමුදාවේ සාමාජිකයින් 11 දෙනෙකු ද ජීවිතක්ෂයට පත්ව ඇති බව අදාළ වාර්තා පෙන්වා දෙයි.
යුද්ධයේ බලපෑම ගල්ෆ් කලාපයේ අනෙකුත් රටවල් වෙත ද සීඝ්රයෙන් පැතිර ගොස් ඇති අතර, කුවේටය සහ එක්සත් අරාබි එමීර් රාජ්යය තුළ මරණ 06 බැගින් ද, ඕමානයේ මරණ 03ක් ද, සෞදි අරාබිය සහ බහරේනය තුළ මරණ 02 බැගින් ද වාර්තා වී ඇත. මීට අමතරව කටාර්, ජෝර්දානය සහ සයිප්රසය යන රටවල් ද ප්රහාරවල බලපෑමට ලක්ව ඇති අතර එම රටවලින් සැලකිය යුතු තුවාලකරුවන් පිරිසක් වාර්තා වී තිබේ. මෙම තත්ත්වය හමුවේ මුළු මැදපෙරදිග කලාපයම දැඩි අස්ථාවරත්වයකට පත්ව ඇති අතර මානුෂීය අර්බුදයක් නිර්මාණය වීමේ අවදානමක් ද මතු වී ඇත.
