ඇමරිකාව සහ ඊශ්රායලය එක්ව ඉරානයට එරෙහිව ආරම්භ කළ යුද්ධය මේ වන විට කලාපීය මට්ටමේ මහා පරිමාණ ගැටුමක් දක්වා වේගයෙන් ව්යාප්ත වෙමින් පවතී. යුද්ධයේ මුල් පැය 48 ඇතුළත ඉරාන උත්තරීතර නායක අයතුල්ලා අලි කමේනි ඝාතනය කිරීමට ඇමරිකානු සහ ඊශ්රායල ප්රහාර සමත් වූ අතර, ඊට ප්රතිචාර ලෙස ඉරානය විසින් අසල්වැසි රටවල් නවයක් (09) ඉලක්ක කර ගනිමින් මිසයිල සහ ඩ්රෝන ප්රහාර සිය ගණනක් එල්ල කර තිබේ.
මාර්තු 2 වැනිදා කලාපයේ බලශක්ති පද්ධති ඉලක්ක කර ගනිමින් එල්ල වූ ප්රහාර මගින් පෙන්නුම් කරන්නේ යුද්ධය තවදුරටත් දරුණු අතට හැරිය හැකි බවයි. මෙය ලෝක තෙල් සහ ගෑස් සැපයුමට සෘජුවම බලපාන “අනතුරු ඇඟවීමේ සංඥාවක්” ලෙස ආරක්ෂක විචාරකයින් පෙන්වා දෙයි. විශේෂයෙන්ම හෝමුස් සමුද්ර සන්ධිය ආශ්රිත ප්රහාර මගින් ලෝක වෙළඳාම දැඩි අර්බුදයකට පත්ව ඇත.
ඇමරිකානු ඒකාබද්ධ මාණ්ඩලික ප්රධානී ජෙනරාල් ඩෑන් කේන් (Dan Caine) සහ ආරක්ෂක ලේකම් පීට් හෙග්සෙත් (Pete Hegseth) පවසන පරිදි, මෙම මෙහෙයුමේ මූලික අරමුණ ඉරානයේ පාලන තන්ත්රය වෙනස් කිරීම (Regime change) නොව, ඉරානය සතු මිසයිල බලය සහ තර්ජනය සහමුලින්ම විනාශ කිරීමයි. කෙසේ වෙතත්, මෙම ඉලක්ක සපුරා ගැනීමට සැලකිය යුතු කාලයක් ගතවනු ඇති බව ඔවුන් වැඩිදුරටත් සඳහන් කරයි.
ඉරානයේ මිත්ර පාර්ශවයන් වන හිස්බුල්ලා (ලෙබනනය), හවුති (යේමනය) සහ ඉරාකයේ සන්නද්ධ කණ්ඩායම් ද මෙම ගැටුමට සෘජුවම මැදිහත් වෙමින් පවතින බැවින්, ඉදිරි දින කිහිපය තුළ යුද්ධය තවදුරටත් දරුණු විය හැකි බවට අනතුරු ඇඟවේ.
