අමෙරිකා – ඊශ්රායල සහ ඉරාන යුද ගැටුම් මැදපෙරදිග කලාපය පුරා ව්යාප්ත වීමත් සමඟ, එහි සේවය කරන ලක්ෂ සංඛ්යාත ආසියානු සංක්රමණික සේවකයන්ගේ ජීවිත දැඩි අවදානමකට ලක්ව ඇති බව අද (01) වාර්තා වේ. කටාර්, සෞදි අරාබිය සහ එක්සත් අරාබි එමීර් රාජ්යය වැනි රටවල පිහිටි අමෙරිකානු හමුදා කඳවුරු ඉලක්ක කර ඉරානය ප්රහාර එල්ල කිරීමත් සමඟ මෙම තත්ත්වය උද්ගත වී තිබේ.
මීට පෙර ආරක්ෂිත කලාප ලෙස සැලකූ ඩුබායි සහ දෝහා වැනි නගර වෙත ද මිසයිල ප්රහාර එල්ල වීම නිසා විදේශීය සංචාරකයන් සහ ධනවත් වැසියන් විශාල වශයෙන් එම රටවලින් ඉවත් වෙමින් සිටිති. කෙසේ වෙතත්, ශ්රී ලංකාව, ඉන්දියාව, පකිස්ථානය, බංග්ලාදේශය සහ පිලිපීනය වැනි රටවලින් පැමිණි මිලියන 24ක පමණ සංක්රමණික සේවකයන්ට තම පවුල් නඩත්තු කිරීම සඳහා පවතින ආර්ථික අවශ්යතාවය හේතුවෙන් යුද බිය මධ්යයේ වුවද එහි රැඳී සිටීමට සිදුව ඇත.
දැනට වාර්තා වී ඇති අන්දමට දකුණු ආසියාතික සංක්රමණික සේවකයන් 12 දෙනෙකු පමණ මෙම යුද ගැටුම් හේතුවෙන් ජීවිතක්ෂයට පත්ව තිබේ. පිලිපීන ජාතික 32 හැවිරිදි මේරි ඈන් වොලස්කේස් (Mary Ann Veolasquez) නමැති සේවිකාව ද ටෙල් අවිව් නුවරට එල්ල වූ මිසයිල ප්රහාරයකින් මියගිය බව තහවුරු විය. බොහෝ සේවකයන් පවසන්නේ තම මව් රටවලට වඩා පස් ගුණයක පමණ වැටුපක් මැදපෙරදිගදී ලැබුණ ද, දිනෙන් දින ඉහළ යන යුද අවදානම හමුවේ තම ජීවිතය රැක ගැනීම සඳහා නැවත මව් රටවලට යාමට කාලය එළඹ ඇති බවයි.
