මැදපෙරදිග කලාපයේ පවතින උණුසුම් යුදමය වාතාවරණය සහ බලශක්ති යටිතල පහසුකම්වලට එල්ල වන ප්රහාරයන් පිළිබඳව ඉන්දීය අග්රාමාත්ය නරේන්ද්ර මෝදි මහතා සිය දැඩි කනස්සල්ල පළ කර තිබේ. ඒ අනුව කටාර්, ප්රංශය, ජෝර්දානය, ඕමානය සහ මැලේසියාව යන රටවල නායකයන් සමඟ දුරකථන සංවාදවල නිරත වෙමින් කලාපීය සාමය සහ ස්ථාවරත්වය යථා තත්ත්වයට පත් කිරීමේ වැදගත්කම අග්රාමාත්යවරයා අවධාරණය කර ඇත. විශේෂයෙන්ම හෝමුස් සමුද්ර සන්ධිය හරහා නිදහස් නාවික ගමනාගමනය පවත්වා ගැනීම ගෝලීය බලශක්ති සුරක්ෂිතතාවයට අත්යවශ්ය බව මෙහිදී සාකච්ඡා වී තිබේ.
කටාර් රාජ්යයේ රාස් ලෆාන් ගෑස් මධ්යස්ථානය වැනි බලශක්ති මධ්යස්ථාන ඉලක්ක කර ගනිමින් එල්ල වන ප්රහාරයන් ඉන්දීය අග්රාමාත්යවරයා දැඩි ලෙස හෙළා දැක ඇති අතර, ඉන්දියාව සැමවිටම කටාර් රාජ්යය සමඟ සහයෝගයෙන් පසුවන බව ද සඳහන් කර ඇත. කලාපීය ගැටලු විසඳීම සඳහා රාජ්ය තාන්ත්රික සාකච්ඡා මාර්ගයන් අනුගමනය කළ යුතු බව පෙන්වා දෙන අග්රාමාත්ය මෝදි, ඉරාන-ඊශ්රායල ගැටුම හේතුවෙන් ලෝක වෙළඳපොළේ බලශක්ති පිරිවැය ඉහළ යාම පාලනය කිරීමට සියලු දෙනා එක්ව කටයුතු කළ යුතු බව ද පවසා තිබේ.
