ඉරානයේ නව උත්තරීතර නායකයා ලෙස අද (මාර්තු 04) පත්වූ මොජ්ටාබා කාමේනි (Mojtaba Khamenei), බටහිර විරෝධය දේශනා කළද, ඔහු රහසිගතව බටහිර රටවල් තුළ අතිවිශාල වත්කම් ප්රමාණයක් රැස් කරගෙන සිටින බවට ජාත්යන්තර මාධ්ය පරීක්ෂණ රැසක් හෙළි කර තිබේ. බ්ලූම්බර්ග් (Bloomberg) පුවත් සේවය පසුගිය ජනවාරි මාසයේදී සිදුකළ වසරක් පුරා දිවෙන විමර්ශනයකට අනුව, මොජ්ටාබා විසින් බ්රිතාන්යයේ ලන්ඩන් නුවර “බිලියනපතියන්ගේ මාවත” (Billionaire’s Row) ලෙස හැඳින්වෙන බිෂොප් ඇවිනියුහි (The Bishops Avenue) පවුම් මිලියන 100කට (ඩොලර් මිලියන 138කට) වඩා වටිනා සුඛෝපභෝගී මන්දිර ජාලයක් පාලනය කරනු ලබයි. මෙම දේපළ සෘජුවම ඔහුගේ නමින් නොමැති වුවද, ‘ෂෙල්’ (Shell) සමාගම් සහ බ්රිතාන්යයේ සම්බාධකවලට ලක්වූ අලි අන්සාරි වැනි ව්යාපාරිකයන් හරහා ඔහු මෙම ගෝලීය දේපළ අධිරාජ්යය මෙහෙයවන බව බුද්ධි අංශ වාර්තා පෙන්වා දෙයි.
මොජ්ටාබාගේ මෙම වත්කම් ජාලය ලන්ඩනයට පමණක් සීමා නොවී ඩුබායිහි සුඛෝපභෝගී විලා (Villas), යුරෝපයේ තරු පහේ හෝටල් සහ ස්විට්සර්ලන්තය, ලිච්ටෙන්ස්ටයින් වැනි රටවල රහසිගත බැංකු ගිණුම් දක්වා විහිදී පවතී. විශේෂයෙන්ම පසුගිය ජනවාරි මාසයේදී පමණක් ක්රිප්ටෝ මුදල් (Crypto) හරහා ඩොලර් මිලියන 328ක මුදලක් ඩුබායි වෙත මාරු කර ඇති බවට තොරතුරු ලැබී ඇති අතර, ඔහුගේ මුළු වත්කම ඩොලර් බිලියන 2කට අධික බව ගණන් බලා ඇත. ඉරාන ජනතාව සම්බාධක හමුවේ දරුණු ආර්ථික අර්බුදයකට මුහුණ දී සිටියදී, චීනයට සහ ඉන්දියාවට අලෙවි කරන ඉරාන තෙල්වලින් ලැබෙන බදු මුදල් මෙලෙස තම පවුලේ පෞද්ගලික පරිහරණය සඳහා සහ සුඛෝපභෝගී ජීවන රටාවක් සඳහා මොජ්ටාබා විසින් යොදා ගන්නා බවට විවේචකයෝ චෝදනා කරති.
