මොණරාගල දිස්ත්රික්කයේ 2025 මහ කන්නයේ බඩඉරිඟු වගාවෙන් මෙවර ඉතා සරු අස්වැන්නක් ලැබී ඇති බව ගොවීන් පවසන අතර, ලැබෙන මිල ප්රමාණවත් නොවීම හේතුවෙන් ඔවුන් දැඩි අර්බුදයකට මුහුණ දී සිටී.
මොණරාගල සහකාර කෘෂිකර්ම අධ්යක්ෂිකා එස්.එම්. සන්ධ්යා උදයංගනී මහත්මිය සඳහන් කළේ දිස්ත්රික්කය තුළ හෙක්ටයාර් 18,000ක පමණ බඩඉරිඟු වගා කර ඇති බවයි. සාමාන්යයෙන් හෙක්ටයාරයකින් මෙට්රික් ටොන් 5.5ක පමණ සාර්ථක අස්වැන්නක් මෙවර ලැබී තිබේ.
බඩඉරිඟු කිලෝවක් සඳහා රුපියල් 150ක සහතික මිලක් රජය ප්රකාශ කර තිබුණ ද, පෞද්ගලික වෙළෙඳුන් කිලෝවක් මිලදී ගන්නේ රුපියල් 100ත් 130ත් අතර අඩු මිලකටය. අස්වනු නෙළන කාලසීමාව තුළ අතරමැදියන්ගේ මෙම මැදිහත්වීම නිසා ගොවීන්ට සිය පිරිවැය පවා පියවා ගැනීමට නොහැකි වී ඇත.
බුත්තල, මොණරාගල සහ සියඹලාණ්ඩුව යන ප්රදේශවල ගොවීන් මේ දිනවල අස්වනු නෙළීම සිදු කරන අතර, කඩින් කඩ පවතින වර්ෂාව හේතුවෙන් අස්වැන්න වියළා ගැනීමට නොහැකි වීම තවත් ගැටලුවකි. අස්වැන්න නිසි ලෙස වියළා ගැනීමට නොහැකි වීමෙන් එහි ගුණාත්මකභාවය අඩුවී තවදුරටත් මිල පහත වැටීමේ අවදානමක් පවතී.
ගොවීන් රජයෙන් ඉල්ලා සිටින්නේ සහතික මිලට අස්වැන්න මිලදී ගැනීම සඳහා රජයේ මැදිහත්වීම කඩිනම් කරන ලෙසයි.
