මොන්ගෝලියානු පාර්ලිමේන්තුවේ පවතින දේශපාලන අර්බුදය සහ ව්යවස්ථාදායක ඇනහිටීම අවසන් කිරීමේ අරමුණින්, එරට නව අග්රාමාත්යවරයා ලෙස උච්රල් න්යම්-ඔසෝර් (Uchral Nyam-Osor) පත් කර තිබේ. වසරක් ඇතුළත මොන්ගෝලියාවේ පත් වූ තෙවන අග්රාමාත්යවරයා වන මොහු, එරට වේගයෙන් වර්ධනය වන ආර්ථික පීඩනය හමුවේ දේශපාලන ස්ථාවරත්වය ඇති කිරීමට උත්සාහ කරනු ඇත. ඊයේ (30) රාත්රියේ පැවැති ඡන්ද විමසීමේදී පාර්ලිමේන්තු මන්ත්රීවරුන් 126 දෙනෙකුගෙන් 107 දෙනෙකු සහභාගී වූ අතර, ඉන් 88 දෙනෙකුගේ (82.2%) වැඩි ඡන්දයෙන් 39 හැවිරිදි උච්රල් මහතා තේරී පත් විය.
මොහු මීට පෙර එරට ඩිජිටල් සංවර්ධන සහ සන්නිවේදන අමාත්යවරයා ලෙස කටයුතු කරමින් විනිවිදභාවය සහ ඩිජිටල් පාලන ප්රතිසංස්කරණ සඳහා විශාල දායකත්වයක් ලබා දුන් අයෙකි. දේශපාලනයට පිවිසීමට පෙර ඔහු “Timon” යන නමින් ප්රසිද්ධ හිප්-හොප් (Hip-hop) ගායකයෙකු ලෙස ජනප්රියත්වයට පත්ව සිටීම ද විශේෂත්වයකි. ඔහු සිය පත්වීමෙන් පසු පාර්ලිමේන්තුව අමතමින් කියා සිටියේ, අභ්යන්තර ආරවුල් මඟින් රටේ ආර්ථිකය තවදුරටත් දුර්වල නොකළ යුතු බවත්, සියලු දෙනා එක්වී පවතින අර්බුදයට මුහුණ දිය යුතු බවත්ය.
මොන්ගෝලියාවේ පවතින දේශපාලන අස්ථාවරත්වය සහ දූෂණය පිළිබඳ චෝදනා හේතුවෙන් විදේශීය ආයෝජකයින් අතර දැඩි කනස්සල්ලක් පවතින මොහොතක මෙම පත්වීම සිදු විය. පාලක පක්ෂය තුළ පවතින කණ්ඩායම් අතර එකඟතාවයකින් පත් වූ මොහු, සෝවියට් යුගයේ සිට පැවත එන පැරණි පාලන ක්රම නවීකරණය කිරීමටත්, ආයෝජන සඳහා හිතකර වටපිටාවක් නිර්මාණය කිරීමටත් කැපවන බවට පොරොන්දු වී තිබේ. 1990 වසරේදී ප්රජාතන්ත්රවාදය කරා ගමන් කළ මොන්ගෝලියාව, මේ වන විට සිය ආර්ථිකය ස්ථාවර කරගැනීම සඳහා දැඩි අරගලයක නිරත වෙමින් සිටී.
