අද (18) පාර්ලිමේන්තුවේදී අදහස් දක්වමින් සමගි ජන බලවේගයේ කොළඹ දිස්ත්රික් මන්ත්රී මුජිබර් රහුමාන් මහතා වත්මන් රජය සහ සභානායක බිමල් රත්නායක මහතා ඉලක්ක කර ගනිමින් දැඩි විවේචනාත්මක ප්රකාශයක් සිදු කළේය. පාර්ලිමේන්තු මන්ත්රීවරුන්ගේ පවුල් සබඳතා සහ අතීත දේශපාලන ක්රියාකලාපයන් ඔහු මෙහිදී ප්රශ්න කළේය.
ජනාධිපති අනුර කුමාර දිසානායක මහතාගේ රජය යටතේ පාර්ලිමේන්තුවට නෝනයි මහත්තයයි, තාත්තායි පුතායි මෙන්ම පෙම්වතා සහ පෙම්වතිය ද පැමිණ ඇති බව ඔහු පැවසීය. “දැන් බෝයි ෆ්රෙන්ඩ් – බෝයි ෆ්රෙන්ඩ් ඉන්නවද කියලත් හොයන්න ඕනෑ” යැයි පවසමින් ඔහු ආන්දෝලනාත්මක ප්රකාශයක් සිදු කළේය.
කතානායකවරයා නිරන්තරයෙන් විපක්ෂයට පහර දෙමින් කතාව පටන් ගන්නා බවත්, ඔහු “මහින්ද චින්තනය” ලියූ අයෙකු බවත් මන්ත්රීවරයා මතක් කර දුන්නේය. එමෙන්ම බිමල් රත්නායක මහතා ඇතුළු පිරිස එදා මහින්ද රාජපක්ෂ මහතා බලයට ගෙන ඒමට කටයුතු කළ බවත්, දැන් රාජපක්ෂවරුන්ට බනින්නේ ඔවුන්ගේම ඡායාරූපයක් ඉදිරියේ තබාගෙන විය යුතු බවත් ඔහු උපහාසාත්මකව ප්රකාශ කළේය.
අතීතයේ පාර්ලිමේන්තුව ගිනි තියන්නට කතා කළ පුද්ගලයන් දැන් පාර්ලිමේන්තු සම්ප්රදායන් ගැන කතා කිරීම හාස්යජනක බව ද මුජිබර් රහුමාන් මහතා මෙහිදී අවධාරණය කළේය. සභානායක බිමල් රත්නායක මහතා සහ මුජිබර් රහුමාන් මහතා අතර ඇති වූ මෙම වචන හුවමාරුව නිසා සභාවේ උණුසුම් තත්ත්වයක් ඇති විය.
