එංගලන්තයේ සහ වේල්සයේ පොලිස් සම්මේලනයේ (Police Federation of England and Wales) ප්රධාන විධායක නිලධාරී ලෙස කටයුතු කළ ඉන්දීය සම්භවයක් සහිත මුකුන්ද් ක්රිෂ්ණා මහතා, මූල්ය වංචා සහ සිය ධුරය අවභාවිත කිරීමේ චෝදනා සම්බන්ධ විමර්ශනයක් හේතුවෙන් අත්අඩංගුවට ගෙන සේවයෙන් අත්හිටුවා තිබේ. ලන්ඩන් නුවර පොලිසිය විසින් ක්රියාත්මක කරන ලද මෙම විශේෂ දූෂණ විමර්ශනයේදී ඔහු ඇතුළු පුද්ගලයින් තිදෙනෙකු අත්අඩංගුවට ගෙන ඇති බව වාර්තා වේ.
විමර්ශනය සහ අත්අඩංගුවට ගැනීම: වසරකට ආසන්න කාලයක් රහසිගතව සිදුකළ විමර්ශනයකින් පසුව ලන්ඩන්, වේල්ස්, සරේ සහ සමර්සෙට් යන ප්රදේශවල සිදුකළ වැටලීම්වලදී මෙම අත්අඩංගුවට ගැනීම් සිදු කර ඇත. 46, 51 සහ 55 යන වයස්වල පසුවන පුද්ගලයින් තිදෙනෙකු මෙහිදී අත්අඩංගුවට ගෙන ඇති අතර, ඒ අතර මුකුන්ද් ක්රිෂ්ණා ද සිටින බව තහවුරු වී තිබේ.
පොලිස් නිලධාරීන් 145,000කට අධික පිරිසක් නියෝජනය කරන මෙම ප්රබල සංවිධානය ප්රකාශ කළේ, පොලිස් විමර්ශන අවසන් වන තෙක් සිය ප්රධාන විධායක නිලධාරියාගේ වැඩ තහනම් කිරීමට පියවර ගත් බවයි. එසේම විමර්ශන සඳහා බලධාරීන්ට පූර්ණ සහය ලබා දෙන බව ද ඔවුන් පවසා ඇත.
මුකුන්ද් ක්රිෂ්ණා යනු කවුද?: 2023 ජූලි මාසයේ සිට මෙම තනතුරේ කටයුතු කළ ඔහු, ඊට පෙර එහි ප්රධාන මෙහෙයුම් නිලධාරී ලෙස ද සේවය කර ඇත. පොලිස් සම්මේලනයට සම්බන්ධ වීමට පෙර ඔහු ඇක්සෙන්චර් (Accenture) සහ ඔරකල් (Oracle) වැනි ලොව ප්රමුඛ පෙළේ සමාගම්වල ඉහළ කළමනාකරණ තනතුරු හොබවා ඇති අයෙකි.
මෙම සිද්ධිය බ්රිතාන්ය පොලිස් සේවයේ ඉහළ නිලධාරීන් අතර දැඩි කතාබහට ලක්ව ඇති අතර, විමර්ශන කටයුතු තවදුරටත් ක්රියාත්මක වේ.
