අරාබි සහ ඉස්ලාමීය රටවල් කිහිපයක් අද (18) ශුද්ධ වූ රාමසාන් මාසය පිළිගන්නා අතර තවත් රටවල් කිහිපයක් හෙට සිට සිය වාර්ෂික උපවාස සමය ආරම්භ කිරීමට නියමිතය. සෞදි අරාබිය විසින් ඊයේ සවස රාමසාන් නව සඳ දර්ශනය වූ බව නිල වශයෙන් ප්රකාශයට පත් කළ අතර ඒ අනුව එරට මුස්ලිම් ජනතාව අද දින සිට උපවාසය ආරම්භ කර තිබේ. සෞදි අරාබියට අමතරව කටාර්, එක්සත් අරාබි එමීර් රාජ්යය, කුවේට්, බහරේන්, පලස්තීනය සහ සුඩානය ඇතුළු රටවල් කිහිපයක ආගමික බලධාරීන් අද බදාදා රාමසාන් මාසයේ පළමු දිනය ලෙස තහවුරු කර ඇත. ඉරාකයේ සුන්නි සහ ෂියා මුස්ලිම්වරුන් මෙන්ම යේමනයේ හවුති පාලන ප්රදේශ සහ ලෙබනනයේ සුන්නි මුස්ලිම් ජනතාව ද අද දින සිට මෙම ශුද්ධ වූ මාසය සැමරීම ආරම්භ කරති.
මේ අතර ඊජිප්තුව ඇතුළු තවත් රටවල් කිහිපයක් හෙට බ්රහස්පතින්දා සිට රාමසාන් උපවාසය ආරම්භ කිරීමට තීරණය කර තිබේ. ඊයේ සවස නව සඳ නොපෙනුණු බැවින් ඊජිප්තුව, ජෝර්දානය, සිරියාව, ඉන්දුනීසියාව, පකිස්ථානය සහ ඉරානය වැනි රටවල් ශුද්ධ වූ මාසයේ ආරම්භය බ්රහස්පතින්දා දක්වා කල් තබා ඇත. තුර්කිය, ඕමානය, සිංගප්පූරුව සහ ඕස්ට්රේලියාව යන රටවල මුස්ලිම් ජනතාව තාරකා විද්යාත්මක ගණනය කිරීම් මත පදනම්ව හෙට සිට උපවාසය ආරම්භ කරන අතර මොරොක්කෝව අද සවස් කාලයේදී රාමසාන් සඳ නිරීක්ෂණය කිරීමට නියමිතව ඇත. ඉස්ලාමීය චන්ද්ර දින දර්ශනයේ නවවන මාසය වන රාමසාන් මාසයේ ආරම්භය තීරණය කිරීමේදී ලොව පුරා රටවල් දේශීය සඳ දැකීම මෙන්ම නවීන තාරකා විද්යාත්මක ගණනය කිරීම් ද භාවිතා කරනු ලබයි.
