අතීතයේ මෙරට පැවති ඉන්ධන අර්බුදය සහ වත්මන් තත්ත්වය අතර පවතින පැහැදිලි වෙනස කෘෂිකර්ම නියෝජ්ය අමාත්ය නාමල් කරුණාරත්න මහතා පෙන්වා දෙයි. ඔහු පවසන්නේ එදා QR ක්රමය හඳුන්වා දීමට සිදු වූයේ මෙරට විදේශ විනිමය හිඟ වී ආර්ථිකය බිඳවැටීම නිසා වුවද, වර්තමානයේ පවතින ගැටලුව ඊට හාත්පසින්ම වෙනස් බවයි. වත්මන් රජය සතුව මුදල් තිබුණද, පවතින ගෝලීය යුදමය වාතාවරණය හමුවේ ලෝක වෙළඳපොළේ ඉන්ධන හිඟයක් නිර්මාණය වී ඇති බැවින් අවශ්ය ප්රමාණයට තෙල් සපයා ගැනීම අසීරු වී ඇති බව ඔහු අවධාරණය කරයි.
මෙය ලංකාව විසින් නිර්මාණය කරන ලද ප්රශ්නයක් නොවන බවත්, ලෝකයේ ප්රබල රටවල් පවා මේ වන විට ඉන්ධන කළමනාකරණය සඳහා විවිධ දැඩි පියවර ගනිමින් සිටින බවත් අමාත්යවරයා පෙන්වා දුන්නේය. ඇතැම් රටවල පාසල් සහ විශ්ව විද්යාල වසා දමා ඇති අතර, වැඩකරන දින ගණන සීමා කර නිවසේ සිට රාජකාරි කිරීමට (Work from Home) උපදෙස් දී ඇති බව ද ඔහු සඳහන් කළේය. ඕස්ට්රේලියාව වැනි දියුණු රටවල් මෙන්ම ඉන්දියාව, පාකිස්තානය සහ බංගලාදේශය වැනි කලාපීය රටවල් ද මෙම තත්ත්වයට මුහුණ දෙමින් සිටින බව ඔහු පවසා සිටියි.
ශ්රී ලංකාව තවමත් එවැනි බරපතල තීරණවලට එළඹ නැති බවත්, රජය සිදු කරන්නේ පවතින සම්පත් උපරිමයෙන් කළමනාකරණය කිරීම පමණක් බවත් නියෝජ්ය අමාත්යවරයා වැඩිදුරටත් කියා සිටියේය. ජාත්යන්තර යුදමය තත්ත්වය නිසා ඇති වී තිබෙන මෙම බරපතල අභියෝගයට මුහුණ දීම සඳහා ජනතාවගේ සහයෝගය අත්යවශ්ය බව ද ඔහු මෙහිදී අවධාරණය කළේය.
