ඉන්ධන මිල ඉහළ දැමීම මඟින් ජනතාව මත බර පැටවීම වෙනුවට, ඉන්ධන ගනුදෙනුවලදී සිදුවන බව කියන දූෂණ සහ අක්රමිකතා නතර කර එමඟින් ලැබෙන වාසිය ජනතාවට ලබා දිය යුතු බව ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා පවසයි. මාධ්ය වෙත අදහස් දක්වමින් ඔහු පෙන්වා දුන්නේ, අතීතයේදී ඉන්ධන ගනුදෙනුවලින් අමාත්යවරුන් විශාල වශයෙන් කොමිස් මුදල් ලබාගන්නා බවට චෝදනා එල්ල වූ බවයි. වර්තමානයේ එවැනි දූෂණ සිදුනොවන්නේ නම්, එම කොමිස් මුදල්වලට අදාළ ප්රමාණය මිලෙන් අඩු කර සහනදායී මිලකට ඉන්ධන ලබා දීමට රජයට හැකියාව පවතින බව ඔහු අවධාරණය කළේය.
පවතින ඉන්ධන මිල ඉහළ යාම ලෝක වෙළෙඳපොළේ තත්ත්වයට වඩා රජයේ වැරදි තීරණවල ප්රතිඵලයක් බව මන්ත්රීවරයා මෙහිදී චෝදනා කළේය. විශේෂයෙන්ම ගල්අඟුරු ගනුදෙනුවලදී සිදුවූ බව කියන අක්රමිකතා හේතුවෙන් සිදු වූ පාඩුව පියවා ගැනීමට රජය මෙලෙස ඉන්ධන මිල ඉහළ නංවන බවත්, ලෝක වෙළෙඳපොළ මිල ගණන් පෙන්වා දෙමින් රජය සිය වැරදි වසා ගැනීමට උත්සාහ කරන බවත් ඔහු පැවසීය. එමෙන්ම, මීට පෙර QR ක්රමවේදය විවේචනය කළ වර්තමාන පාලකයන් දැන් එම ක්රමයම ක්රියාත්මක කිරීමට පෙළඹී ඇති බව ද ඔහු පෙන්වා දුන්නේය. සෞඛ්ය, ප්රවාහන, වෙළෙඳ සහ සංචාරක වැනි ඉන්ධන මත යැපෙන අත්යවශ්ය සේවා සපයන්නන් මුහුණ දෙන ප්රායෝගික දුෂ්කරතා කෙරෙහි රජය වහාම අවධානය යොමු කළ යුතු බව ද නාමල් රාජපක්ෂ මහතා වැඩිදුරටත් සඳහන් කළේය.
