මාතලේදී පැවැති ශ්රී ලංකා පොදුජන පෙරමුණේ කාන්තා දින සැමරුම් උත්සවයකට එක්වෙමින් එම පක්ෂයේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ මහතා ප්රකාශ කළේ, පසුගිය කාලයේ ඇති වූ අරගලකාරී වාතාවරණය හමුවේ එවකට පැවැති රජය අඩියක් පස්සට ගත්තේ රට තුළ මනුෂ්ය ඝාතන වැළැක්වීමට සහ රාජ්යය ආරක්ෂා කර ගැනීමට බවයි. බංග්ලාදේශය හෝ නේපාලය වැනි රටවල මෙන් දහස් ගණනකගේ ජීවිත අහිමි කරමින් බලය රැකගන්නවා වෙනුවට, ගෝඨාභය රාජපක්ෂ මහතාගේ රජය එදා තීරණය කළේ සමාජ ව්යසනයක් වළක්වා ගැනීමට බව ඔහු මෙහිදී පෙන්වා දුන්නේය. එම තීරණය නිසා ආණ්ඩුව බිඳ වැටුණ ද, අද වන විට ප්රජාතන්ත්රවාදී රාමුව තුළ ආණ්ඩු පෙරළීමට හෝ පිහිටුවීමට ඇති හැකියාව සුරැකුණේ එදා ගත් එම පරිත්යාගශීලී තීන්දුව නිසා බව මන්ත්රීවරයා වැඩිදුරටත් සඳහන් කළේය.
කාන්තාවන්ගේ භූමිකාව පිළිබඳව අදහස් දක්වමින් නාමල් රාජපක්ෂ මහතා කියා සිටියේ, ඕනෑම අභියෝගයකදී පවුලක් තුළ මුලින්ම පීඩාවට පත්වන්නේ කාන්තාව බවයි. යුද්ධය පැවති සමයේදී තම දරුවන් යුද බිමට යවමින් අම්මාවරුන් කළ කැපවීම මෙන්ම, වත්මන් රජයේ අසීමිත බදු ප්රතිපත්තිය සහ ඉහළ ජීවන වියදම හමුවේ කුස්සියේ කළමනාකරණය සිදුකරන කාන්තාව අද වන විට දැඩි දුෂ්කරතාවයකට මුහුණ දී සිටින බව ඔහු පැවසීය. සිරිමාවෝ බණ්ඩාරනායක මැතිණිය වැනි ශක්තිමත් නායිකාවන් ඉතිහාසය පුරා අසීරු තීන්දු ගත් ආකාරය සිහිපත් කළ ඔහු, වත්මන් ජනාධිපතිවරයා මැදපෙරදිග අර්බුදයේදී ගන්නා තීන්දු සඳහා ද එවැනි ඉතිහාසගත ආභාෂයන් බලපාන්නට ඇති බව විශ්වාසය පළ කළේය.
මැදපෙරදිග කලාපයේ පවතින උණුසුම් යුදමය වාතාවරණය පිළිබඳව ද අවධානය යොමු කළ මන්ත්රීවරයා, එහි සේවය කරන දහස් සංඛ්යාත ශ්රී ලාංකික කාන්තාවන් සහ ඊශ්රායලයේ සිටින තරුණ තරුණියන්ගේ ආරක්ෂාව තහවුරු කිරීමට රජය වහාම මැදිහත් විය යුතු බව අවධාරණය කළේය. ලෝකය ඉතා වේගයෙන් යුදමය තත්ත්වයකට ගොදුරු වෙමින් පවතින බැවින්, ඉදිරි පැය 48 තුළ පවා තත්ත්වය වෙනස් විය හැකි බවත්, එවැනි අනාගත අභියෝගවලට මුහුණ දීමට ශක්තිමත් දේශපාලන බලවේගයක් අවශ්ය බවත් ඔහු පැවසීය. ශ්රී ලංකා පොදුජන පෙරමුණේ කාන්තා සංවිධානය ඉදිරියේදී පාර්ලිමේන්තු නියෝජනය සඳහා ද දක්ෂ නායිකාවන් බිහි කරනු ඇතැයි තමන් විශ්වාස කරන බව පවසමින් මන්ත්රීවරයා සිය කතාව අවසන් කළේය.
