ඉන්දීය අග්රාමාත්ය නරේන්ද්ර මෝදි මහතා ඉන්ස්ටග්රෑම් (Instagram) සමාජ මාධ්ය ජාලයේ අනුගාමිකයන් මිලියන 100 ක සංඛ්යාව පසු කළ ලොව ප්රථම දේශපාලනඥයා සහ ලෝක නායකයා ලෙස අද (26) ඓතිහාසික සන්ධිස්ථානයකට එළඹ තිබේ. 2014 වසරේදී මෙම පද්ධතියට එක් වූ අග්රාමාත්යවරයා, වසර දහයක් වැනි කෙටි කාලයක් තුළ තම ඩිජිටල් සබඳතාව ඉතා ශක්තිමත් කරගෙන ඇත. දැනට දෙවන ස්ථානයේ පසුවන අමෙරිකානු ජනාධිපති ඩොනල්ඩ් ට්රම්ප් මහතා සතු වන්නේ අනුගාමිකයන් මිලියන 43.2 ක් පමණක් වන අතර, මෝදි මහතාගේ අනුගාමික සංඛ්යාව ට්රම්ප් මහතාගේ සංඛ්යාව මෙන් දෙගුණයකටත් වඩා වැඩි වීම විශේෂත්වයකි.ලෝක මට්ටමින් පමණක් නොව ඉන්දීය දේශපාලනය තුළ ද ඔහු මේ අතින් ඉදිරියෙන්ම සිටියි. උත්තර ප්රදේශ් මහ ඇමති යෝගී ආදිත්යනාත් (මිලියන 16.1) සහ කොංග්රස් නායක රාහුල් ගාන්ධි (මිලියන 12.6) යන නායකයන්ට වඩා අතිවිශාල පරතරයකින් අග්රාමාත්යවරයා ඉදිරියෙන් සිටින බව වාර්තා වේ. මෝදි මහතාගේ ඉන්ස්ටග්රෑම් ගිණුම හරහා නිල සංචාර, සංස්කෘතික අවස්ථා සහ ජනතාව සමඟ පවත්වන සමීප සබඳතා නිරන්තරයෙන් ප්රදර්ශනය කෙරෙන අතර, එය විශේෂයෙන්ම තරුණ පරපුර අතර වඩාත් ජනප්රිය වී තිබේ.අනුගාමිකයන් සංඛ්යාවට අමතරව, මෝදි මහතා ලෝක නායකයන් අතර ඉහළම ජනප්රියත්වයක් හිමි නායකයා ලෙස ද තවදුරටත් වැජඹෙයි. ‘Morning Consult’ ආයතනය විසින් 2026 පෙබරවාරි මස නිකුත් කළ නවතම දත්ත වාර්තාවලට අනුව, 67% ක අනුමැතියක් (Approval Rating) ලබා ගනිමින් ඔහු ලොව ජනප්රියම නායකයා ලෙස ප්රමුඛස්ථානයේ පසුවෙයි. දෙවන ස්ථානය චෙක් ජනරජයේ ඇන්ඩ්රෙජ් බබිස් (59%) හට හිමිව ඇති අතර, අමෙරිකානු ජනාධිපති ඩොනල්ඩ් ට්රම්ප් 40% ක අනුමැතියක් සමඟින් 11 වන ස්ථානය දක්වා පසු බැස ඇත. මෙම දත්ත මගින් නරේන්ද්ර මෝදි මහතාගේ ගෝලීය බලපෑම සහ ජනතා ආකර්ෂණය ඩිජිටල් අවකාශය තුළ මෙන්ම සැබෑ දේශපාලනය තුළ ද අසමසම වී ඇති බව මැනවින් තහවුරු වේ.
