ඇමරිකානු ආගමන සහ රේගු බලාත්මක කිරීමේ අංශය (ICE) විසින් මාර්තු මස මුලදී නැෂ්විල් නුවරදී අත්අඩංගුවට ගනු ලැබූ ‘Nashville Noticias’ ආයතනයේ මාධ්යවේදිනී එස්ටෙෆනි මරියා රොඩ්රිගස් ෆ්ලෝරෙස් බ්රහස්පතින්දා දිනයේදී නිදහස් කර තිබේ. දින 16ක රඳවා තබා ගැනීමකින් පසු ඩොලර් 10,000ක ඇපයක් මත ඇයව මුදා හැරීමට පියවර ගත් බව ඇයගේ නීතිඥ කණ්ඩායම තහවුරු කළේය.
වසර පහක කාලයක් ඇමරිකාවේ ජීවත් වී ඇති ෆ්ලෝරෙස්, ICE ආයතනයේ ක්රියාකලාපය විවේචනය කරමින් නිරන්තරයෙන් වාර්තාකරණයේ යෙදුණු අයෙකු බවත් ඇයගේ අත්අඩංගුවට ගැනීම මාධ්ය නිදහස උල්ලංඝනය කිරීමක් බවත් මානව හිමිකම් සංවිධාන පෙන්වා දෙයි. ඇය සංචාරක වීසා මගින් ඇමරිකාවට පැමිණ දේශපාලන රැකවරණ ඉල්ලා ඇති අතර, පසුව ඇමරිකානු පුරවැසියෙකු සමඟ විවාහ වී වලංගු රැකියා බලපත්රයක් ද ලබාගෙන ඇති බව ඇයගේ නීතිඥ මයික් හොලි මහතා සඳහන් කරයි.
කෙසේ වෙතත්, ට්රම්ප් පාලනාධිකාරිය චෝදනා කරන්නේ ඇයගේ සංචාරක වීසා කාලය 2021 වසරෙන් පසු අවසන් වී ඇති බැවින් ඇය මෙරට රැඳී සිටීමට අවසර නොමැති බවයි. ජනාධිපති ඩොනල්ඩ් ට්රම්ප්ගේ දැඩි ආගමන විගමන ප්රතිපත්ති යටතේ සිදු කෙරෙන මෙවැනි අත්අඩංගුවට ගැනීම් හරහා භාෂණයේ නිදහසට බාධා එල්ල වන බවට ක්රියාකාරීන් චෝදනා කරන නමුත්, රටේ ආරක්ෂාව සඳහා නීති විරෝධී සංක්රමණ පාලනය කළ යුතු බව රජයේ ස්ථාවරය වී තිබේ. ඉදිරියේදී මෙවැනි අසාධාරණ හිරිහැර කිරීම් වළක්වා ගැනීම සඳහා අධිකරණ නියෝගයක් ලබා ගැනීමට ඇයගේ නීතිඥයින් සූදානම් වන අතර ඇයට එරෙහිව පවරා ඇති නඩුව තවදුරටත් විභාග වනු ඇත.
