කාන්තාවන්ගේ ශ්රමය නිසි ලෙස ඇගයීමට ලක්වන සාධාරණ සමාජයක් සහ සුරැකුම් ආර්ථිකයක් වෙනුවෙන් ජාතික සුරැකුම් පද්ධතියක් (National Care Policy) සැකසීම අත්යවශ්ය බව අග්රාමාත්ය ආචාර්ය හරිනි අමරසූරිය අවධාරණය කරයි. පාර්ලිමේන්තු මන්ත්රීවරියන්ගේ සංසදය විසින් ඉදිරිපත් කරන ලද යෝජනාවක් පිළිබඳව ඊයේ (05) පාර්ලිමේන්තුවේදී අදහස් දක්වමින් ඇය මේ බව ප්රකාශ කළාය.
අග්රාමාත්යවරිය මෙහිදී මතු කළ ප්රධාන කරුණු අනුව, වසර හයකට පෙර තමන් පාර්ලිමේන්තුවේ මංගල කතාව පවත්වන විට සුරැකුම් ආර්ථිකය පිළිබඳ මාතෘකාව අලුත් දෙයක් වුවත් අද වන විට එය ජාතික ප්රතිපත්තියක් දක්වා ගෙන ඒමට තරම් ශක්තිමත් කණ්ඩායමක් පාර්ලිමේන්තුව තුළ සිටීම සතුටට කරුණකි. කාන්තාවන්ට පුරවැසියන් ලෙස සියලුම ක්ෂේත්ර තුළ සමාන හා ගෞරවනීය ලෙස සහභාගී වීමට ඇති අයිතිය පිළිගනිමින් ඒ සඳහා පවතින ප්රධාන බාධක ඉවත් කිරීමට රජය මැදිහත් විය යුතු බව ඇය පෙන්වා දුන්නාය. එමෙන්ම සමාජ මාධ්ය සහ මාධ්ය අවකාශය තුළ කාන්තාවගේ ගෞරවය ආරක්ෂා වන ලෙස එම පද්ධතීන් සංවිධානය විය යුතු බවත්, එය හුදෙක් නීතියෙන් පමණක් නොව සමාජ පරිවර්තනයක් තුළින් සිදුවිය යුතු බවත් ඇය වැඩිදුරටත් අවධාරණය කළාය.
අන්තර්ජාතික කාන්තා දිනයට සමගාමීව ඉදිරිපත් වූ මෙම යෝජනාව හරහා, දේශපාලනය හා රාජ්ය සේවය ඇතුළු සියලු ක්ෂේත්රවල කාන්තා නියෝජනය ශක්තිමත් කිරීමට අපේක්ෂා කෙරේ.
