ශ්රී ලංකාවේ යුක්තිය පසිඳලීමේ ක්රියාවලිය ශක්තිමත් කිරීම සහ වඩාත් අවදානමට ලක්වූ ප්රජාවන් සඳහා නීති ආධාර සැපයීමේ අරමුණින් සංවිධානය කරන ලද විශේෂ සංවාදයක් පසුගිය 20 සහ 21 යන දිනවල කොළඹ මැරියට් හෝටලයේදී පැවැත්විණි. ශ්රී ලංකා නීති ආධාර කොමිෂන් සභාව විසින් සංවිධානය කරන ලද මෙම වැඩසටහන යුරෝපා සංගමයේ මූල්ය දායකත්වයෙන් ක්රියාත්මක වන ‘යුක්තිය සඳහා සහාය ව්යාපෘතියේ’ (JURE) තවත් එක් ප්රධාන පියවරකි.
අධිකරණ සහ ජාතික ඒකාබද්ධතා අමාත්යාංශය සමඟ එක්ව එක්සත් ජාතීන්ගේ සංවර්ධන වැඩසටහන (UNDP) සහ එක්සත් ජාතීන්ගේ ළමා අරමුදල (UNICEF) මෙම ව්යාපෘතිය මෙහෙයවනු ලබයි. අධිකරණ ක්ෂේත්රයේ නවෝත්පාදනය සහ සහයෝගිතාව උදෙසා ඉහළ මට්ටමේ වේදිකාවක් නිර්මාණය කළ මෙම සමුළුවට නීති ආධාර කොමිෂන් සභාව, අධිකරණ අමාත්යාංශය, ශ්රී ලංකා නීතිඥ සංගමය, විශ්වවිද්යාල සහ සිවිල් සමාජ සංවිධාන නියෝජනය කරමින් විශාල පිරිසක් එක්ව සිටියහ.
මෙහිදී විශේෂයෙන්ම අවධානය යොමු කෙරුණේ නීති ආධාර යනු හුදෙක් සේවාවක් පමණක් නොව, එය අයිතිවාසිකම් මත පදනම් වූ රාජ්ය සේවාවක් බවට පරිවර්තනය කළ හැකි ආකාරය පිළිබඳවයි. වඩාත් පීඩාවට පත් ප්රජාවන් වෙනුවෙන් විධිමත් නීති ආධාර ප්රතිපත්ති රාමුවක් සකස් කිරීම මෙහි ප්රධාන අරමුණක් විය. අධිකරණ සහ ජාතික ඒකාබද්ධතා අමාත්යාංශයේ ලේකම් ජනාධිපති නීතිඥ අයේෂා ජිනසේන මෙනෙවිය මෙහි ප්රධාන දේශනය පැවැත්වූවාය.
මෙම අවස්ථාවට නීති ආධාර කොමිසමේ සභාපති ජනාධිපති නීතිඥ විවේකානන්දන් පුවිතරන්, UNDP නේවාසික නියෝජිත අසූසා කුබෝටා සහ UNICEF ළමා ආරක්ෂණ ප්රධානී Teona Aslanishvili යන මහත්ම මහත්මීහු ද එක් වූහ. මීට අමතරව පොලිසිය, බන්ධනාගාර දෙපාර්තමේන්තුව, සමථ මණ්ඩල කොමිෂන් සභාව සහ ළමා ආරක්ෂණ අධිකාරිය වැනි රාජ්ය ආයතන රැසක නියෝජිතයන්ගේ සහභාගීත්වයෙන් මෙම සංවාදය තවදුරටත් අර්ථවත් විය.
