ජාතික නාමල් උයන ශ්රී ලංකාවේ ජාතික උරුමයක් ලෙස ප්රකාශයට පත් කිරීම වෙනුවෙන් ජනාධිපති කාර්යාලයේදී පැවැති උත්සවය අතරතුර, එහි නිර්මාතෘ පූජ්ය වනවාසී රාහුල හිමියන් විසින් රාජ්ය නිලධාරීන්ගේ ක්රියාකලාපය සම්බන්ධයෙන් දැඩි විවේචනයක් එල්ල කර තිබේ. දශක තුනකට අධික කාලයක් තමන් වහන්සේ තනිවම මෙම ස්වභාවික සම්පත ආරක්ෂා කර ගැනීමට ගත් උත්සාහය සහ එහිදී මුහුණ දුන් බාධාවන් සිහිපත් කරමින් උන්වහන්සේ අදහස් දක්වා ඇත. විශේෂයෙන්ම ජාතික උරුමයක් ලෙස ප්රකාශයට පත් කිරීමෙන් පසු හෝ නිලධාරීන් මීට වඩා වගකීමෙන් යුතුව කටයුතු කළ යුතු බව උන්වහන්සේ අවධාරණය කළහ.
මෙම අවස්ථාවේදී අදහස් දක්වමින් වනවාසී රාහුල හිමියන් කියා සිටියේ, අතීතයේ සිටම ඇතැම් නිලධාරීන් මෙම ව්යාපෘතියට සහාය දෙනවා වෙනුවට විවිධ බාධා පමුණුවමින් කටයුතු කළ බවයි. “නිලධාරීන් මේක හදලා දෙන්න, මට වෙන කියන්න දෙයක් නැහැ” යනුවෙන් පවසමින් උන්වහන්සේ නිලධාරීන් වෙත සිය අප්රසාදය සහ දැඩි ඉල්ලීම ඉදිරිපත් කළහ. මෙම සුවිශේෂී පරිසර පද්ධතිය මතු පරපුර උදෙසා රැක ගැනීමට නම් නිලධාරීන්ගේ කැපවීම සහ විනිවිදභාවය අත්යවශ්ය බව උන්වහන්සේ වැඩිදුරටත් සිහිපත් කළහ.
පූජ්ය වනවාසී රාහුල හිමියන්ගේ මෙම ප්රකාශයත් සමඟ උත්සවයට සහභාගී වූ නිලධාරීන් මෙන්ම දේශපාලන අධිකාරිය ද දැඩි අවධානයකට ලක්වූ අතර, ජාතික උරුමයක් ලෙස ප්රකාශයට පත් වූ ජාතික නාමල් උයන ඉදිරියේදී වඩාත් විධිමත් කළමනාකරණයකට යටත් වනු ඇතැයි අපේක්ෂා කෙරේ. දකුණු ආසියාවේ විශාලතම රෝස තිරුවාණා කඳු පන්තිය සහ විශාලතම නා වනාන්තරය රැක ගැනීම ජාතික වගකීමක් බව මෙම හමුවේදී යළිත් තහවුරු විය.
