පාතාල ක්රියාකාරකම් මැඩපවත්වා මහජන ආරක්ෂාව තහවුරු කිරීමේ අරමුණින් දිවයින පුරා පිහිටි පොලිස් ස්ථාන 608ක් ආවරණය වන පරිදි දැවැන්ත ආරක්ෂක වැඩපිළිවෙළක් ආරම්භ කර තිබේ. පොලිස්පති නීතිඥ ප්රියන්ත වීරසූරිය මහතාගේ ඍජු අධීක්ෂණය යටතේ ක්රියාත්මක මෙම මෙහෙයුම, පසුගිය 18 වැනිදා සිට ක්රියාත්මක වන පරිදි සැලසුම් කර ඇති බව පොලිස් මූලස්ථානය සඳහන් කරයි.
මෙම විශේෂ ආරක්ෂක වැඩපිළිවෙළ යටතේ දිවයිනේ පොලිස් කොට්ඨාස 48ම ආවරණය වන පරිදි පැය 24 පුරා ක්රියාත්මක ක්ෂණික මාර්ග බාධක යෙදවීම, වාහන පරීක්ෂාව සහ හදිසි සෝදිසි මෙහෙයුම් සිදු කෙරේ. විශේෂයෙන්ම පාතාල ක්රියාකාරකම් බහුලව වාර්තා වන බස්නාහිර සහ දකුණු පළාත් කේන්ද්ර කරගනිමින් මෙම මෙහෙයුම් වඩාත් දැඩිව ක්රියාත්මක කිරීමට උපදෙස් දී ඇත.
මෙම මෙහෙයුම සඳහා පොලිස් විශේෂ කාර්ය බළකාය (STF), බුද්ධි අංශ නිලධාරීන් සහ සියලුම විශේෂ පොලිස් ඒකකවල සහාය ලබා ගැනීමට කටයුතු යොදා තිබේ. සියලුම ජ්යෙෂ්ඨ පොලිස් නිලධාරීන්ගේ දායකත්වයෙන් ක්රියාත්මක වන මෙමඟින් අපරාධකරුවන් අත්අඩංගුවට ගැනීම සහ නීති විරෝධී ආයුධ සොයා ගැනීම වේගවත් කරනු ඇතැයි අපේක්ෂා කෙරේ.
