රුසියාව සහ යුක්රේනය අතර පවතින දීර්ඝකාලීන යුදමය වාතාවරණය හුදෙක් මිනිස් ජීවිතවලට පමණක් නොව, එම ප්රදේශවල වෙසෙන සුනඛ ප්රජාවගේ පැවැත්මට ද දැඩි බලපෑමක් එල්ල කරමින් තිබේ. නවතම පර්යේෂණ වාර්තාවලට අනුව, යුද ගැටුම් පවතින ප්රදේශවල ජීවත්වන සුනඛයින් අතර ස්වභාවික වරණ ක්රියාවලිය පෙර නොවූ විරූ වේගයකින් සිදුවෙමින් පවතින බව අනාවරණය වී ඇත. බෝම්බ ප්රහාර, අඛණ්ඩ ආහාර හිඟය සහ අස්ථාවර පාරිසරික තත්ත්වයන් හමුවේ මෙම සතුන්ගේ ශරීර ආකෘතිය, සෞඛ්යය මෙන්ම සමස්ත ජීවන රටාවම ශීඝ්ර වෙනසකට භාජනය වෙමින් පවතින බව විද්යාඥයෝ පෙන්වා දෙති.
මෙම පර්යේෂණයේ කැපී පෙනෙන සොයා ගැනීමක් වන්නේ යුද ප්රදේශවල වෙසෙන සුනඛයින්ගේ ශරීර ප්රමාණය ක්රමයෙන් කුඩා වෙමින් පැවතීමයි. පවතින පීඩාකාරී පරිසරය තුළ දිවි රැක ගැනීම සඳහා දිගු මුහුණ සහ තියුණු කන් වැනි වල් සතුන්ට සමාන ලක්ෂණ ඔවුන් තුළ වැඩි වශයෙන් වර්ධනය වෙමින් පවතී. අඛණ්ඩව මුහුණ දීමට සිදුව ඇති ආහාර හිඟය හේතුවෙන් මෙම සතුන්ගේ ශරීර බර අඩු වී ඇති අතර, බෝම්බ ප්රහාර හා අනතුරු නිසා බොහෝ සතුන් ශාරීරික ආබාධවලට මෙන්ම විවිධ රෝගී තත්ත්වයන්ට ද ගොදුරු වී සිටිති.
විද්යාඥයින් පවසන පරිදි මෙය ක්ෂණික ජානමය පරිණාමයක් නොවන නමුත්, පවතින කර්කශ පරිසරයට ඔරොත්තු දිය හැකි ලක්ෂණ සහිත සතුන් පමණක් ඉතිරි වීමෙන් සිදුවන ස්වාභාවික ක්රියාවලියකි. යුද්ධය නිසා බොහෝ ගෘහස්ථ සුනඛයින් අත්හැර දමා ඇති අතර, මිනිසුන් කෙරෙහි පැවති සමීප බව දුරස් වී ආහාර සොයා ගැනීම සඳහා දඩයමට යොමු වීම වැනි වල් සුනඛයින්ට ආවේණික හැසිරීම් ඔවුන් තුළ ප්රබලව වර්ධනය වෙමින් පවතී. මිනිසාගේ සමීපතම මිතුරා ලෙස සැලකෙන සුනඛයා, යුද්ධයේ අතුරුඵලයක් ලෙස යළිත් වනචාරී ලක්ෂණ කරා ගමන් කරමින් සිටීම දෛවෝපගත කරුණකි.
