ඊශ්රායල අග්රාමාත්ය බෙන්ජමින් නෙතන්යාහු සහ ඇමරිකානු ජනාධිපති ඩොනල්ඩ් ට්රම්ප් අතර සඳුදා රාත්රියේ පැවැති දුරකථන සංවාදයකින් අනතුරුව, මැදපෙරදිග පවතින ගැටුම්කාරී වාතාවරණය සමනය කර ගැනීම සඳහා නව ගිවිසුමකට එළඹීමේ අවස්ථාවක් පවතින බව ඊශ්රායල අග්රාමාත්යවරයා ප්රකාශ කර තිබේ. ඇමරිකානු හමුදා සහය ඇතිව මෙතෙක් ලබාගෙන ඇති ජයග්රහණ පදනම් කරගනිමින් යුද අරමුණු ඉටු කර ගැනීමට ජනාධිපති ට්රම්ප් දැඩි විශ්වාසයකින් පසුවන බව නෙතන්යාහු සිය නිල ‘X’ ගිණුම හරහා වීඩියෝ පණිවිඩයක් නිකුත් කරමින් සඳහන් කළේය.
මෙම සාකච්ඡාව සිදුවූයේ ඉරානයේ බලශක්ති යටිතල පහසුකම් ඉලක්ක කර ගනිමින් එල්ල කරන ප්රහාර දින පහක කාලයකට අත්හිටුවීමට ඇමරිකාව සහ ඊශ්රායලය එකඟතාවකට පැමිණ ඇති පසුබිමක ය. කෙසේ වෙතත්, අනාගතයේදී ඇති කර ගන්නා ඕනෑම ගිවිසුමක් මගින් ඇමරිකාවේ සහ ඊශ්රායලයේ වැදගත් අවශ්යතා සහ ආරක්ෂාව තහවුරු විය යුතු බව ද නෙතන්යාහු අවධාරණය කර ඇත. මෙම එකඟතාවන් පිළිබඳව සාකච්ඡා කෙරෙමින් පවතින අතරතුර ද ඉරානයට සහ ලෙබනනයට එල්ල කරන ප්රහාර නතර නොකරන බව ඔහු වැඩිදුරටත් කියා සිටියේය.
තවද, ඉරානයේ න්යෂ්ටික වැඩසටහනට සහ හිස්බුල්ලා සංවිධානයට එල්ල කළ ප්රහාර මගින් ඔවුන්ට දැඩි බලපෑමක් එල්ල කර ඇති බවත්, පසුගිය දින කිහිපය තුළ ඉරාන න්යෂ්ටික විද්යාඥයන් දෙදෙනෙකු ඝාතනය කිරීමට ඊශ්රායලය සමත් වූ බවත් අග්රාමාත්යවරයා අනාවරණය කළේය. මැදපෙරදිග කලාපයේ බලතුලනය තමන්ට වාසිදායක ලෙස පවත්වා ගනිමින් හමුදාමය ක්රියාමාර්ග සහ රාජ්ය තාන්ත්රික සාකච්ඡා යන අංශ දෙකම ඔස්සේ ඉදිරියට යන බව ඊශ්රායලයේ ස්ථාවරය වී තිබේ.
