ඊශ්රායල අග්රාමාත්ය බෙන්ජමින් නෙතන්යාහු දකුණු ලෙබනනයේ සංචාරයක නිරත වූ බව පවසමින්, ඊශ්රායල හමුදා සාමාජිකයින් සමඟ සිටින දර්ශන පෙළක් නිකුත් කර තිබේ. හිස්බුල්ලා සංවිධානයේ ප්රබල මධ්යස්ථානයක් වන බින්ට් ජුබෙයිල් (Bint Jbeil) නගරය ආසන්නයේ ඊශ්රායල හමුදාව සහ හිස්බුල්ලා සටන්කාමීන් අතර දරුණු ගැටුම් පවතින පසුබිමක මෙම සංචාරය සිදුවීම විශේෂත්වයකි. අග්රාමාත්යවරයා මෙහිදී අවධාරණය කළේ ඇමෙරිකාව සහ ඉරානය අතර පවතින සටන් විරාම සාකච්ඡා ලෙබනනයේ ක්රියාන්විතවලට බලපෑමක් නොවන බවයි. හිස්බුල්ලා සංවිධානය සතු අවි ආයුධ ඉවත් කරන තෙක් සහ ඔවුන් දේශසීමාවෙන් පසුබසින තෙක් සිය ප්රහාර අඛණ්ඩව ක්රියාත්මක කරන බව ඔහු යළිත් සහතික කළේය.
ඊශ්රායල හමුදා බින්ට් ජුබෙයිල් නගරයේ සැලකිය යුතු ප්රදේශයක් අත්පත් කරගෙන ඇති අතර, රෝහලක් තුළ සැඟව සිටි සටන්කාමීන් 20 දෙනෙකු පමණ මරා දැමූ බව ඊශ්රායලය පවසයි. ඉරානය සමඟ සාකච්ඡා පැවතියද, ලෙබනනය තුළ සටන් විරාමයක් සඳහා වන යෝජනා ඊශ්රායලය මේ දක්වා ප්රතික්ෂේප කර ඇත. මේ අතර දකුණු ලෙබනනයේ සිවිල් ජනතාව ලක්ෂ 4කට අධික පිරිසක් අවතැන් වී ඇති බවත්, දැඩි ආහාර සහ ඖෂධ හිඟයක් පවතින බවත් එක්සත් ජාතීන්ගේ සංවිධානය අනතුරු අඟවයි. නෙතන්යාහුගේ මෙම ලෙබනන සංචාරය සිය හමුදාවල චිත්තවේගය ඉහළ නැංවීමටත්, ජාත්යන්තර බලපෑම් නොතකා හමුදා ක්රියාමාර්ගය ඉදිරියට ගෙන යන බවටත් ලබාදුන් ප්රබල පණිවිඩයක් ලෙස විචාරකයෝ හඳුන්වා දෙති.
තොරතුරු උපුටා ගැනීම: Al jazeera (X)ඇසුරින්
