ආදායම් බලපත්රයක් නොමැතිව රිය පැදවීම, අපරික්ෂාකාරී ලෙස රිය ධාවනය, රිය අනතුරක් වළක්වා නොගැනීම සහ තුවාල සිදු කිරීම යන චෝදනාවලට අධිකරණය හමුවේ වරද පිළිගත් පොලිස් සැරයන්වරයෙකුට රුපියල් 12,500ක දඩයක් නියම කිරීමට නිකවැරටිය මහේස්ත්රාත් චාන්දන ලියනගේ මහතා කටයුතු කළේය. මෙලෙස දඩ නියම වූයේ නිකවැරටිය කොට්ඨාස රථවාහන අංශයට අනුයුක්තව සේවය කරන, කොටවෙහෙර මොන්නෑකුලම පදිංචි ආර්. එම්. ඉන්දික ප්රසාද් අධිකාරි නමැති සැරයන්වරයාටය.
මෙම නඩුවට පාදක වූ සිදුවීම වාර්තා වන්නේ 2024 වසරේ ජූනි මස 27 වැනිදා නිකවැරටිය තුඹුල්ල හන්දියේදීය. විත්තිකාර සැරයන්වරයා විසින් පදවන ලද යතුරුපැදිය, කොටවෙහෙර සෞඛ්ය වෛද්ය නිලධාරි කාර්යාලයේ මහජන සෞඛ්ය පරීක්ෂක නාලක චන්ද්රසේකර මහතා ගමන් කරමින් සිටි මෝටර් රථයේ ගැටීමෙන් මෙම අනතුර සිදුව ඇති බව අධිකරණයේදී කරුණු අනාවරණය විය.
සිද්ධිය සම්බන්ධයෙන් නිකවැරටිය පොලීසියේ රථවාහන අංශය විසින් පවරන ලද නඩුවේදී විත්තිකරු සිය වරද පිළිගැනීමෙන් අනතුරුව මෙම තීන්දුව ලබා දී තිබේ. මෙහිදී පැමිණිල්ල වෙනුවෙන් නිකවැරටිය පොලීසියේ නිලධාරීන් පෙනී සිටි අතර විත්තිකාර සැරයන්වරයා වෙනුවෙන් නීතිඥ එච්. එම්. හේරත් මහතා අධිකරණය හමුවේ කරුණු ඉදිරිපත් කරන ලදී.
