ඉරිදා (15) උදෑසන උතුරු සහ දකුණු ගාසා තීරයට එල්ල වූ ඊශ්රායල ගුවන් ප්රහාරවලින් අවම වශයෙන් පලස්තීනුවන් නව දෙනෙකු ජීවිතක්ෂයට පත්ව ඇති බව පලස්තීන සිවිල් ආරක්ෂක සහ සෞඛ්ය බලධාරීන් තහවුරු කරයි. මින් සිව් දෙනෙකු මියගොස් ඇත්තේ අවතැන් වූ පවුල් රැඳී සිටි කූඩාරම් කඳවුරකට එල්ල වූ ප්රහාරයකින් වන අතර, දකුණුදිග ඛාන් යුනිස් (Khan Younis) ප්රදේශයට එල්ල වූ තවත් ප්රහාරයකින් පස් දෙනෙකු මියගොස් තිබේ.
ඊශ්රායල ආරක්ෂක අංශ (IDF) ප්රකාශ කරන්නේ හමාස් සංවිධානය සටන් විරාම ගිවිසුම දරුණු ලෙස උල්ලංඝනය කිරීමට ප්රතිචාර වශයෙන් මෙම ප්රහාර එල්ල කළ බවයි. බීට් හැනූන් (Beit Hanoun) ප්රදේශයේ පවතින උමගකින් සන්නද්ධ තැතිගැන්වූවන් පිරිසක් මතු වී, සටන් විරාමය යටතේ එකඟ වූ “කහ රේඛාව” (Yellow Line) පසු කර ඇති බවට ඊශ්රායලය චෝදනා කරයි. ඊශ්රායල හමුදා නිලධාරියෙකු පවසා සිටියේ හමාස් සංවිධානය ඔක්තෝබර් මාසයේ සිට ක්රියාත්මක සටන් විරාම ගිවිසුම හය වතාවකට වඩා උල්ලංඝනය කර ඇති බවයි.
අමෙරිකානු ජනාධිපති ඩොනල්ඩ් ට්රම්ප්ගේ මැදිහත් වීමෙන් ක්රියාත්මක වන ගාසා යුද්ධය නැවැත්වීමේ සාම සැලසුමේ ප්රධාන අංගයක් වන මෙම සටන් විරාමය උල්ලංඝනය කිරීම සම්බන්ධයෙන් ඊශ්රායලය සහ හමාස් සංවිධානය දිගින් දිගටම එකිනෙකාට චෝදනා කර ගනිමින් සිටියි. ඊශ්රායල හමුදා පවසන්නේ සටන් විරාම ගිවිසුමට අනුකූලව උතුරු ගාසා තීරයේ භූගත උමං විනාශ කිරීමේ කටයුතු තවදුරටත් සිදු කරන බවයි.
ගාසා සෞඛ්ය අමාත්යාංශයේ දත්ත වලට අනුව, සටන් විරාම ගිවිසුම ආරම්භ වූ දා සිට මේ දක්වා ඊශ්රායල ප්රහාරවලින් පලස්තීනුවන් 600 කට අධික පිරිසක් මියගොස් ඇත. එම කාලසීමාව තුළදීම සන්නද්ධ කණ්ඩායම්වල ප්රහාරවලින් ඊශ්රායල සෙබළුන් සිව් දෙනෙකු මියගොස් ඇති බව ඊශ්රායලය තහවුරු කරයි.
