තලංගම, අකුරේගොඩ ප්රදේශයේදී නීතිඥ බුද්ධික මල්ලවආරච්චි මහතා සහ ඔහුගේ බිරිඳ වෙඩි තබා ඝාතනය කිරීමේ සිදුවීම සම්බන්ධයෙන් ජාතික ජන බලවේගයේ නීතිඥයින් නිවේදනයක් නිකුත් කරමින් සිය දැඩි සංවේගය සහ පිළිකුල පළ කර තිබේ. පසුගිය පාලකයින් විසින් තම පටු දේශපාලන අරමුණු වෙනුවෙන් පෝෂණය කළ මැර කල්ලි විසින්, පුරවැසි අයිතිවාසිකම් වෙනුවෙන් පෙනී සිටින වෘත්තිකයන් ඉලක්ක කර ගනිමින් එල්ල කළ මෙම ප්රහාරය සමස්ත නීතිඥ ප්රජාවටම එල්ල වූ තර්ජනයක් ලෙස ඔවුන් හඳුන්වා දී ඇත.
මෙම අඳුරු අපරාධ සංස්කෘතිය නිමා කිරීම සඳහා වර්තමාන රජය ක්රියාත්මක වන වේගයටත් වඩා වැඩි වේගයකින් කටයුතු කළ යුතු බව මෙම සිදුවීමෙන් පසක් වන බව එම නිවේදනයේ සඳහන් වේ. දහවල් කාලයේ මහජනයා ගැවසෙන ප්රදේශයක මෙවැනි සන්නද්ධ ප්රහාරයක් එල්ල කිරීමට අපරාධකරුවන්ට ඇති හැකියාව ජාතික ආරක්ෂාව පිළිබඳ බරපතළ ප්රශ්නයක් බවත්, මීට පෙර මාධ්යවේදීන්, පොලිස් නිලධාරීන් සහ විනිසුරුවරුන් ඉලක්ක කළ මෙම ලේ පිපාසිත මැරයින්ගේ ඊළඟ ඉලක්කය ඕනෑම වෘත්තිකයෙකු විය හැකි බවත් ඔවුන් පෙන්වා දෙයි.
සියලු පුරවැසියන්ගේ ආරක්ෂාව සහ යුක්තිය පසිඳලීම වෙනුවෙන් පත් කරන ලද ජාතික ජන බලවේගයේ ආණ්ඩුව මෙම වගකීම නිසි ලෙස ඉටු කරනු ඇතැයි තමන් බලාපොරොත්තු වන බව නීතිඥයින් පවසති. එබැවින් ශ්රී ලංකා පොලිසිය ඇතුළු රාජ්ය යාන්ත්රණය කඩිනම් සහ විධිමත් විමර්ශනයක් පවත්වා අපරාධකරුවන් වහාම නීතිය හමුවට පැමිණවිය යුතු බව ඔවුන් සිය නිවේදනය මගින් අවධාරණය කර ඇත.
