නුවරඑළිය මහාධිකරණයේ දීර්ඝ කාලයක් විභාග වූ මනුෂ්ය ඝාතන නඩු තුනකට අදාළව වැරදිකරුවන් වූ පුද්ගලයන් සිව්දෙනෙකුට මහාධිකරණ විනිසුරු විරාජ් වීරසූරිය මහතා විසින් අද (02) මරණ දඬුවම නියම කරන ලදී. වසර ගණනාවක් පුරා ඇදී ගිය මෙම නඩු තීන්දුවලින් ප්රධාන අපරාධ කිහිපයක සුලමුල අනාවරණය වී තිබේ.
1998 වසරේ නානුඔය පොලිස් වසමේදී 57 හැවිරිදි පුද්ගලයෙකු ඝාතනය කිරීමේ වරදට 47 හැවිරිදි පොන්නම්බලම් සදීෂ් නැමැත්තාට මරණ දඬුවම නියම විය. එමෙන්ම 2019 වසරේ පට්ටිපොළ ප්රදේශයේදී තම මව, බිරිඳ සහ දරුවා ඝාතනය කිරීමේ බරපතල චෝදනාවට වරදකරු වූ 55 හැවිරිදි ආර්.එම්. චන්ද්රතිලක නැමැත්තාට ද මරණ දඬුවම නියම කෙරිණි. මෙම නඩු ද්විත්වයම නානුඔය පොලිසිය විසින් මෙහෙයවනු ලැබීය.
මීට අමතරව 1990 වසරේ බගවන්තලාව ප්රදේශයේදී තියුණු ආයුධයකින් පහර දී පුද්ගලයෙකු ඝාතනය කිරීමේ වරදට 64 හැවිරිදි වීරරත්න සහ 62 හැවිරිදි කරුප්පයියා අන්නදොරෙයි යන පුද්ගලයන් දෙදෙනාට ද මරණ දඬුවම නියම විය. වසර 36කට පමණ පෙර සිදුවූ මෙම ඝාතනය සම්බන්ධයෙන් යුක්තිය පසිඳලීම මෙලෙස අවසන් විය.
