පසුගිය අඟහරුවාදා ඇමරිකාවේ ඔහියෝ ප්රාන්තයට ඉහළ අහසේ ප්රබල උල්කාපාත පිපිරීමක් සිදුවූ අතර එහි කම්පනය ටී.එන්.ටී. පුපුරණ ද්රව්ය ටොන් 250ක බලයට සමාන වූ බව නාසා ආයතනය තහවුරු කරයි. මීටර් දෙකක් පමණ පළල සහ ටොන් හතක් බරැති මෙම උල්කාපාතය වායුගෝලයට ඇතුළු වී පිපිරී යාම නිසා ඔහියෝ, පෙන්සිල්වේනියා සහ මිචිගන් යන ප්රාන්තවලට දැවැන්ත ශබ්දයක් සහ ආලෝක ධාරාවක් දර්ශනය විය. මෙවැනි ප්රබල පිපිරීමක් සිදුවන තෙක් ඒ පිළිබඳව පූර්ව අනතුරු ඇඟවීමක් කිරීමට නාසා ආයතනයට නොහැකි වීම පිළිබඳව දැන් ලෝකයේ අවධානය යොමු වී තිබේ.
නාසා ආයතනයේ ග්රහලෝක ආරක්ෂක අංශය ප්රධාන වශයෙන් අවධානය යොමු කරන්නේ පෘථිවියට විශාල විනාශයක් කළ හැකි මීටර් 140කට වඩා විශාල ග්රාහකයන් පිළිබඳව වුවද මෙම ඔහියෝ උල්කාපාතය මීටර් දෙකක් වැනි කුඩා ප්රමාණයක පැවතීම නිසා වත්මන් දුරේක්ෂ පද්ධතිවලට එය කල්තියා හඳුනාගැනීම අතිශය දුෂ්කර වී ඇත. නාසා හි ග්රහලෝක ආරක්ෂක අංශ ප්රධානී කෙලී ෆාස්ට් පවසන පරිදි, හොලිවුඩ් චිත්රපටවල පෙන්වන ලෝකයම විනාශ කරන දැවැන්ත ග්රාහකයන් පිළිබඳව ඔවුන් බිය නොවන්නේ එවැනි විශාල වස්තූන් පවතින ස්ථාන විද්යාඥයන් දැනටමත් හඳුනාගෙන ඇති බැවිනි. නමුත් කලාපීය විනාශයක් කළ හැකි මීටර් 140ක පමණ ප්රමාණයේ ග්රාහකයන් 25,000ක් පමණ අභ්යවකාශයේ සැරිසරන අතර ඉන් හඳුනාගෙන ඇත්තේ 40%ක් පමණක් වීම විශේෂත්වයකි.
බොහෝ කුඩා උල්කාපාත දර්ශනය වන්නේ ඒවා පෘථිවි වායුගෝලයට ඇතුළු වී ඝර්ෂණය නිසා දැවී යාමට පටන් ගත් පසුව වන අතර මෙම ඔහියෝ උල්කාපාතය ද කිලෝමීටර් 80ක් පමණ ඉහළ අහසේදී පළමුව දර්ශනය වී පසුව කිලෝමීටර් 48ක් පමණ උසකදී කැබලිවලට කැඩී ගොස් තිබේ. මෙම සිදුවීමත් සමඟ පෘථිවිය අවට සැරිසරන කුඩා හා මධ්යම ප්රමාණයේ අභ්යවකාශ වස්තූන් හඳුනාගැනීමේ තාක්ෂණය තවදුරටත් දියුණු කිරීමේ අවශ්යතාවය විද්යාඥයන් අවධාරණය කරයි.
