ඕමානයේ සොහාර් (Sohar) නගරයේ ස්ථාන දෙකකට ඩ්රෝන යානා දෙකක් කඩා වැටීමෙන් විදේශීය සේවකයන් දෙදෙනෙකු ජීවිතක්ෂයට පත්ව ඇති බව එරට ආරක්ෂක අංශ තහවුරු කරයි. ඉන් එක් ඩ්රෝන යානයක් අල් අව්හි (Al Awhi) කාර්මික කලාපයට කඩා වැටී ඇති අතර, එහිදී පුද්ගලයින් දෙදෙනෙකු මියගොස් තවත් කිහිප දෙනෙකු තුවාල ලබා තිබේ. අනෙක් ඩ්රෝන යානය ජනාවාස නොමැති විවෘත ප්රදේශයකට කඩා වැටී ඇති බැවින් ඉන් කිසිදු ජීවිත හානියක් සිදුවී නොමැත.
මෙම අනතුරු සම්බන්ධයෙන් එරට අදාළ බලධාරීන් මේ වන විට පුළුල් පරීක්ෂණ ආරම්භ කර ඇති අතර, සිද්ධිය වූ ස්ථානවල ආරක්ෂාව තහවුරු කිරීමට කටයුතු කරමින් සිටියි. ඕමාන වැසියන්ගේ සහ එහි වෙසෙන විදේශිකයන්ගේ ආරක්ෂාව වෙනුවෙන් සියලු සම්පත් යොදවන බවත්, රටේ ආරක්ෂාව සම්බන්ධයෙන් උපරිමයෙන් කටයුතු කරන බවත් ආරක්ෂක අංශ අවධාරණය කර සිටියි.
පවතින තත්ත්වය හමුවේ අසත්ය ප්රචාර හෝ සිද්ධියට අදාළ ඡායාරූප සමාජ මාධ්ය හරහා හුවමාරු කර නොගන්නා ලෙසත්, නිල පුවත් මූලාශ්ර කෙරෙහි පමණක් විශ්වාසය තබන ලෙසත් බලධාරීන් මහජනතාවගෙන් ඉල්ලා සිටියි. සොහාර් යනු ඕමානයේ ප්රධාන කාර්මික නගරයක් වන බැවින් මෙම ප්රහාරයේ මූලාශ්රය පිළිබඳව තවදුරටත් විමර්ශන ක්රියාත්මක වේ.
