2026 පෙබරවාරි 28 වනදා මධ්යම රාත්රියේ සිට ක්රියාත්මක වූ ‘Operation Epic Fury’ නමැති දැවැන්ත ඒකාබද්ධ ගුවන් මෙහෙයුම මගින් ඉරාන උත්තරීතර නායක අයතුල්ලා අලි කමේනි ඇතුළු එරට ප්රබලතම දේශපාලන සහ මිලිටරි නායකයින් 40 දෙනෙකු ඝාතනය කිරීමට සමත් වූ බව අමෙරිකානු ජනාධිපති ඩොනල්ඩ් ට්රම්ප් සහ ඊශ්රායල අගමැති බෙන්ජමින් නෙතන්යාහු නිල වශයෙන් නිවේදනය කර සිටිති. ඉරාන රාජ්ය මාධ්ය මුලදී මෙම වාර්තා හුදෙක් ‘මනෝවිද්යාත්මක යුද්ධයක්’ ලෙස හඳුන්වමින් ප්රතික්ෂේප කළද, පසුව උත්තරීතර නායකයාගේ මරණය නිල වශයෙන් තහවුරු කළේය. මෙම ප්රහාරවලින් ඉරාන විප්ලවීය ආරක්ෂක බලකායේ (IRGC) ප්රධාන අණදෙන නිලධාරියා සහ ආරක්ෂක අමාත්යවරයා ද ජීවිතක්ෂයට පත්ව ඇති බව වාර්තා වේ.
උත්තරීතර නායකයාගේ ඝාතනයට ප්රතිචාර වශයෙන් ඉරානය විසින් සිය ගණනක බැලිස්ටික් මිසයිල සහ ඩ්රෝන ප්රහාර මාලාවක් ඊශ්රායලය සහ මැදපෙරදිග පිහිටි අමෙරිකානු කඳවුරු ඉලක්ක කර ගනිමින් දියත් කර තිබේ. බහරේනයේ පිහිටි අමෙරිකානු 5 වන නාවික බලඇණි මූලස්ථානය මෙන්ම කුවේටය, කටාර් සහ එක්සත් අරාබි එමීර් රාජ්යය වෙත ද මෙම මිසයිල පතිත වී ඇති අතර, අබුඩාබි හි සයීඩ් ජාත්යන්තර ගුවන්තොටුපළේදී එක් අයෙකු මියගොස් ඇති බව වාර්තා වේ. ඉරානය පුරා පළාත් 24ක පුද්ගලයන් 200කට අධික පිරිසක් මියගොස් ඇති අතර, මිනාබ් නගරයේ බාලිකා පාසලකට එල්ල වූ ප්රහාරයකින් දරුවන් 115ක් පමණ ජීවිතක්ෂයට පත්වීම ජාත්යන්තරයේ දැඩි කම්පනයක් ඇති කිරීමට හේතු විය.
මෙම දැවැන්ත හමුදා මෙහෙයුම හේතුවෙන් මැදපෙරදිග කලාපයේ ගුවන් කලාප වසා දැමීමට පියවර ගෙන ඇති අතර, ඩුබායි ජාත්යන්තර ගුවන්තොටුපළ ඇතුළු ප්රධාන ගුවන් ගමන් මධ්යස්ථානවල සියලුම මෙහෙයුම් දින නියමයක් නොමැතිව අත්හිටුවා තිබේ. ඉරානය තුළ රජය විසින් අන්තර්ජාලය සම්පූර්ණයෙන්ම විසන්ධි කර ඇති පසුබිමක වුවද, සමහර ප්රදේශවල ජනතාව උත්තරීතර නායකයාගේ මරණය සැමරීමට වීදි බැස ඇති බවත්, තවත් පිරිසක් යුද බිය හේතුවෙන් නගර අතහැර යන බවත් විදෙස් මාධ්ය වාර්තා කරයි. ඊශ්රායලයේ ටෙල් අවිව් නගරයට එල්ල වූ ප්රහාරවලින් ද එක් කාන්තාවක මියගොස් සියයකට අධික පිරිසක් තුවාල ලබා ඇත.
ජාත්යන්තර මට්ටමින් රුසියාව සහ චීනය මෙම මෙහෙයුම “අසාධාරණ ආක්රමණයක්” ලෙස හඳුන්වමින් දැඩි ලෙස හෙළා දකින අතර, යුක්රේනය සහ කැනඩාව අමෙරිකානු ක්රියාමාර්ගය සාධාරණීකරණය කරමින් සහාය පළ කර තිබේ. එක්සත් ජාතීන්ගේ ආරක්ෂක මණ්ඩලය හදිසියේ රැස්වී වහාම සටන් විරාමයකට එළඹෙන ලෙස පාර්ශවයන්ගෙන් ඉල්ලා සිටියද, ජනාධිපති ට්රම්ප් අවධාරණය කර ඇත්තේ අමෙරිකානු යුද අරමුණු සම්පූර්ණයෙන් ඉටුවන තෙක් ඉදිරි සතිය පුරා මෙම ප්රහාර අඛණ්ඩව දියත් කරන බවයි.
