ඉරානයට එරෙහිව ආරම්භ කර ඇති ‘එපික් ෆියුරි’ (Operation Epic Fury) මෙහෙයුම සඳහා ඇමෙරිකානු රජයට දැරීමට සිදුවන පිරිවැය පිළිබඳව විවිධ ආර්ථික විශ්ලේෂණයන් මේ වන විට ඉදිරිපත් වෙමින් පවතී. මෙහෙයුමේ මුල් පැය 24 ඇතුළත පමණක් ඇමෙරිකාව ඩොලර් මිලියන 779ක් පමණ වැය කර ඇති බවට ඇස්තමේන්තු කර ඇති අතර, මෙහෙයුමට පෙර සිදුකළ සූදානම් කිරීම් සහ හමුදා ස්ථානගත කිරීම් සඳහා තවත් ඩොලර් මිලියන 630ක් වැය වී ඇති බව වාර්තා වේ. ඇමෙරිකානු ගුවන් යානා වාහක නෞකා බලඇණියක් දිනකට නඩත්තු කිරීම සඳහා පමණක් ඩොලර් මිලියන 6.5ක් වැය වන අතර, දැනට මෙවැනි නෞකා කණ්ඩායම් දෙකක් මැදපෙරදිග ස්ථානගත කර ඇත. 2023 ඔක්තෝබර් මාසයේ සිට මේ දක්වා ඉරානය සහ ඒ අවට කලාපයේ සිදුකළ මෙහෙයුම් සඳහා ඇමෙරිකානු බදු ගෙවන්නන්ගේ මුදලින් ඩොලර් බිලියන 9.65 සිට 12.07 දක්වා ප්රමාණයක් දැනටමත් වැය කර තිබේ.
මෙම මෙහෙයුම සඳහා ගුවන්, නාවික සහ ගොඩබිම් අංශවල අවි පද්ධති 20කට අධික සංඛ්යාවක් භාවිතා වේ. ඒ අතරට B-1 සහ B-2 ස්ටෙල්ත් බෝම්බ හෙලන යානා, F-35 සහ F-22 වැනි දියුණු ප්රහාරක යානා ඇතුළත් වේ. එසේම ටොමහෝක් (Tomahawk) කෲස් මිසයිල සහ පළමු වරට යුධ පිටියේදී භාවිතා කරන LUCAS ඩ්රෝන යානා ද මේ සඳහා යොදා ගැනේ. ඉරාන මිසයිල පාලනය කිරීම සඳහා භාවිතා කරන පේට්රියට් (Patriot) සහ තාඩ් (THAAD) මිසයිල ආරක්ෂක පද්ධති ද මෙහි ප්රධාන අංගයකි.
මෙහෙයුම ආරම්භ වූ සෙනසුරාදා සිට මේ දක්වා ඉරානය තුළ ඉලක්ක 1,250කට අධික ප්රමාණයකට ප්රහාර එල්ල කර ඇති අතර, ඉරාන නෞකා 11ක් විනාශ කර ඇති බව ඇමෙරිකානු මධ්යම විධානය (CENTCOM) තහවුරු කරයි. ඉරාන රතු අඩ සඳ සංවිධානයට අනුව, මෙම ප්රහාර හමුවේ ඉරානයේ පුද්ගලයන් 555 දෙනෙකු ජීවිතක්ෂයට පත්ව ඇත. පිරිවැයට වඩා ඇමෙරිකාව මුහුණ දෙන ප්රධානතම ගැටලුව වන්නේ ආයුධ තොග පවත්වාගෙන යාම බව විශේෂඥයෝ පෙන්වා දෙති. විශේෂයෙන්ම මිසයිල නාශක පද්ධති සඳහා අවශ්ය මිසයිල තොග අවසන් වීමේ අවදානමක් පවතින බවට වෝල් ස්ට්රීට් ජර්නල් පුවත්පත අනතුරු අඟවා ඇතත්, ජනාධිපති ට්රම්ප් පවසන්නේ ඇමෙරිකාව සතුව සීමා රහිත ආයුධ පවතින බවයි.
