කාන්තා කොමිෂන් සභාව ස්වාධීන ආයතනයක් ලෙස පැවතිය යුතු වුවත්, රජය විසින් එය කාන්තා හා ළමා කටයුතු අමාත්යාංශය යටතේ ගැසට් කිරීම හරහා එහි ස්වාධීනත්වය බරපතල ලෙස උල්ලංඝනය වී ඇති බව විපක්ෂ නායක සජිත් ප්රේමදාස මහතා අද (18) පාර්ලිමේන්තුවේදී ප්රකාශ කළේය.
සාමාන්යයෙන් රාජ්ය සේවා, මැතිවරණ, අල්ලස් හෝ දූෂණ සහ මානව හිමිකම් වැනි ස්වාධීන කොමිෂන් සභාවලට අයවැයෙන් ප්රතිපාදන වෙන් කරන්නේ ‘විශේෂ වියදම් ඒකක’ යටතේය. එමඟින් එම ආයතන කිසිදු අමාත්යාංශයකට වගකීමට බැඳී නොසිටින අතර ඒවායේ ස්වාධීනත්වය ආරක්ෂා වේ.
කෙසේ වෙතත්, වත්මන් රජය කාන්තා කොමිසම අමාත්යාංශයක් යටතට පත් කිරීම නිසා අනෙකුත් කොමිෂන් සභාවලට හිමි වරප්රසාදය එයට අහිමි වී ඇති බව ප්රේමදාස මහතා පෙන්වා දුන්නේය. මෙය රටේ ජනගහනයෙන් 52%ක් වන කාන්තාවන්ට සිදු කළ අපහාසයක් ලෙස ඔහු හැඳින්වීය.
මේ සම්බන්ධයෙන් කථානායකවරයාගේ අවධානය යොමු විය යුතු බවත්, ස්වාධීන කොමිෂන් සභාවක් අමාත්යාංශයක් යටතට පත් කිරීම වැරදි පූර්වාදර්ශයක් බවත් විපක්ෂ නායකවරයා වැඩිදුරටත් අවධාරණය කළේය.
