ඇෆ්ගනිස්ථානය සහ පාකිස්තානය අතර දේශසීමා ආතතිය උත්සන්න වෙමින් පවතින පසුබිමක, පාකිස්තාන ගුවන් හමුදාව විසින් කාබුල් නුවර පිහිටි තලේබාන් හමුදා මූලස්ථානයක් ඉලක්ක කර ගනිමින් ප්රබල බෝම්බ ප්රහාරයක් එල්ල කර තිබේ. අද (27) උදෑසන වාර්තා වූ මෙම ප්රහාරය, දෙරට අතර පවතින දේශසීමා ගැටුම් තීරණාත්මක මට්ටමකට පැමිණ ඇති බව පෙන්නුම් කරන්නකි.
පසුගිය කාලසීමාව පුරාම දෙරටේ දේශසීමා ආසන්නයේ සටන්කාමීන්ගේ ක්රියාකාරකම් සම්බන්ධයෙන් පාකිස්තානය සහ තලේබාන් පාලනය අතර දැඩි මතභේද පුවතිණි. පාකිස්තාන බලධාරීන් චෝදනා කරන්නේ තම රට තුළ ත්රස්තවාදී ක්රියා සිදු කරන කණ්ඩායම්වලට ඇෆ්ගනිස්ථානය තුළ රැකවරණය ලැබෙන බවයි. මෙම ප්රහාරය එම චෝදනාවලට ප්රතිචාරයක් ලෙස හෝ දේශසීමා ආරක්ෂාව තහවුරු කිරීමේ අරමුණින් සිදු කරන ලද්දක් බව ආරක්ෂක අංශ විශ්ලේෂණය කරයි.
මෙම බෝම්බ ප්රහාරයෙන් සිදු වූ ජීවිත හානි හෝ දේපළ හානි පිළිබඳ නිශ්චිත තොරතුරු මෙතෙක් නිල වශයෙන් අනාවරණය වී නොමැති වුවද, ප්රහාරයත් සමඟ කාබුල් නුවර ආරක්ෂාව දැඩි කර ඇති බව විදෙස් මාධ්ය වාර්තා කරයි. මෙම සිදුවීම කලාපීය ස්ථාවරත්වයට දැඩි බලපෑමක් එල්ල කළ හැකි අතර, තලේබාන් පාර්ශ්වය මීට දක්වන ප්රතිචාරය පිළිබඳව ජාත්යන්තර ප්රජාව දැඩි අවධානයෙන් පසුවෙයි.
