ඇෆ්ගනිස්ථානය සහ පාකිස්ථානය අතර හවුල් දේශසීමා කලාපය දැඩි යුධ පිටියක් බවට පත්වෙමින් පවතින අතර, ඇෆ්ගන් තලෙයිබාන් රජයට එරෙහිව පාකිස්ථානය “විවෘත යුද්ධයක්” ප්රකාශ කර තිබේ. පසුගිය සතියේ සිදුවූ මාරාන්තික ගුවන් ප්රහාරවලට පළිගැනීමක් ලෙස ඇෆ්ගන් හමුදා පාකිස්ථාන දේශසීමා භටයින්ට ප්රහාර එල්ල කිරීමත් සමඟ තත්ත්වය අතිශය බරපතල වී ඇති අතර, ඊට ප්රතිචාර ලෙස පාකිස්ථානය විසින් කාබුල් සහ කන්දහාර් නගර වෙත ප්රබල බෝම්බ ප්රහාර එල්ල කර ඇත. තම ඉවසීමේ සීමාව ඉක්මවා ගොස් ඇති බවත්, දැන් පවතින්නේ දෙරට අතර සෘජු විවෘත යුද්ධයක් බවත් පාකිස්ථාන ආරක්ෂක අමාත්ය කවාජා අසීෆ් (Khawaja Asif) නිල වශයෙන් ප්රකාශ කර තිබීම විශේෂත්වයකි.
මෙම ප්රචණ්ඩත්වය හේතුවෙන් දෙපාර්ශවයේම සොල්දාදුවන් දුසිම් ගණනක් මියගොස් ඇති බව වාර්තා වන අතර, කටාර් රාජ්යයේ මැදිහත්වීමෙන් පවත්වාගෙන ගිය සටන් විරාමය ද මේ වන විට බිඳ වැටීමේ අවදානමකට ලක්ව ඇත. ඇෆ්ගන් අගනුවර වන කාබුල් මෙන්ම කන්දහාර් සහ පක්ටියා පළාත් ඉලක්ක කරගනිමින් පාකිස්ථානය ගුවන් ප්රහාර එල්ල කර ඇති බව තලෙයිබාන් ප්රකාශක සබිහුල්ලා මුජාහිඩ් තහවුරු කර තිබේ. මීට පෙර ඇෆ්ගනිස්ථානය ප්රකාශ කළේ තමන් පාකිස්ථාන හමුදා මුරපොලවල් 12කට වැඩි ප්රමාණයක් අල්ලා ගත් බව වුවද, පාකිස්ථාන රජය එම ප්රකාශ අසත්ය බව පවසමින් ප්රතික්ෂේප කර ඇත.
ගැටුම් හේතුවෙන් සිවිල් වැසියන් ද දැඩි පීඩාවට පත්ව ඇති අතර, ටෝර්කාම් (Torkham) දේශසීමා හරස් මාර්ගය අසල පිහිටි සරණාගත කඳවුරකට එල්ල වූ මෝටාර් ප්රහාරයකින් පුද්ගලයින් හත් දෙනෙකු තුවාල ලබා ඇති බව වාර්තා වේ. පසුගිය ඔක්තෝබර් මාසයේ සිට දේශසීමා බොහෝ දුරට වසා දමා තිබුණද, මෙම නව යුධමය තත්ත්වය කලාපීය ස්ථාවරත්වයට දැඩි තර්ජනයක් එල්ල කර තිබේ. දේශසීමා ආශ්රිතව රැඳී සිටින සටන්කාමීන් මර්දනය කිරීමේ අරමුණින් මෙම ප්රහාර එල්ල කරන බව පාකිස්ථානය පවසන අතර, එය තම ස්වෛරීභාවයට එල්ල වූ ප්රහාරයක් ලෙස සලකා ඇෆ්ගනිස්ථානය ප්රතිප්රහාර එල්ල කරමින් සිටියි.
