පාකිස්ථානයේ විශාලතම තෙල් සහ ගෑස් සමාගම වන OGDC ආයතනය, එරට බලශක්ති සුරක්ෂිතතාව තහවුරු කිරීම සහ පුනර්ජනනීය බලශක්ති ප්රභවයන් වෙත යොමුවීම ඉලක්ක කරගත් සුවිශේෂී ද්විත්ව උපායමාර්ගික සැලසුමක් ප්රකාශයට පත් කර තිබේ. මේ පිළිබඳව අදහස් දක්වමින් එම සමාගමේ කළමනාකාර අධ්යක්ෂ සහ ප්රධාන විධායක නිලධාරී අහමඩ් හයාත් ලක් (Ahmed Hayat Lak) මහතා සඳහන් කළේ, වසර පහක කාලයක් සඳහා වන නිෂ්පාදන ප්රශස්තකරණ මාර්ග සිතියමක් මේ වන විට ක්රියාත්මක වෙමින් පවතින බවයි. මීට අමතරව අබුඩාබි වෙරළාසන්න තෙල් කැණීම් ව්යාපෘති සඳහා ආයෝජනය කරමින් තම ව්යාපාරික කටයුතු ජාත්යන්තරය දක්වා ව්යාප්ත කිරීමට ද එම සමාගම පියවර ගෙන ඇත.
පරිසර හිතකාමී බලශක්ති ප්රභවයන් වෙත යොමුවීමේ පියවරක් ලෙස, ෂලම්බර්ගර් (Schlumberger) ආයතනය සමඟ ඒකාබද්ධව භූතාපජ බලශක්ති ව්යාපෘතියක් (Geothermal Energy Project) සඳහා ද OGDC ආයතනය අත්හදා බැලීම් ආරම්භ කර තිබේ. එසේම ගෝලීය කාබන් විමෝචනය අවම කිරීමේ ප්රඥප්තියට (Oil and Gas Decarbonization Charter) අත්සන් තබමින් පරිසර සුරැකීම සම්බන්ධයෙන් ජාත්යන්තර ප්රමිතීන්ට අනුගත වීමට ද ඔවුන් කැපවී සිටින බව මෙහිදී අවධාරණය කෙරිණි.
එක්සත් අරාබි එමීර් රාජ්යය ඇතුළු ජාත්යන්තර ආයෝජකයින්ට පාකිස්ථානයේ තෙල් සහ ගෑස් ක්ෂේත්රයට එක්වන ලෙස ආරාධනා කරන OGDC ප්රධානියා, ඉදිරියේදී බලුකිස්ථානය සහ හයිබර් පක්තුන්ක්වා වැනි ප්රදේශවල නව කැණීම් කටයුතු පුළුල් කිරීමට වැඩි අවධානයක් යොමු කරන බව ද සඳහන් කළේය. මැදපෙරදිග පවතින අස්ථාවරත්වය සහ ඉන්ධන මිල ඉහළ යාමේ අවදානම හමුවේ මෙවැනි ද්විත්ව උපායමාර්ගික සැලසුම් කලාපීය බලශක්ති ස්ථාවරත්වයට ඉතා වැදගත් වනු ඇත.
